ខេត្តកណ្តាល៖ គំរោងសាងសង់អាកាសយានដ្ឋានអន្តរជាតិភ្នំពេញថ្មី ដែលមានទីតាំងនៅខេត្តកណ្តល និងខេត្តតាកែវ បានចេញជារូបរាងបណ្តើរៗហើយ។គំរោងសាងសង់ អាកាសយានដ្ឋានអន្តរជាតិភ្នំពេញថ្មីនេះ មានទុនវិនិយោគ ១.៥០០លានដុល្លារ ជាការវិនិយោគរបស់ក្រុមហ៊ុនសាជីវកម្មក្រៅប្រទេសកម្ពុជា(OCIC) ដោយដំណាក់កាលទី១ និងត្រូវបញ្ចប់ការសាងសង់ក្នុងឆ្នាំ ២០២២ ។
ក្នុងឱកាសចុះពិនិត្យវឌ្ឍនភាព គម្រោងសាងសង់ អាកាសយានដ្ឋានអន្តរជាតិភ្នំពេញថ្មី កាលពីថ្ងៃទី៣មិថុនាឆ្នាំ២០២០នេះ ឯកឧត្តម ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណៈកម្មការ រៀបចំទីតាំងគម្រោងសាងសង់អាកាសយានដ្ឋានអន្តរជាតិភ្នំពេញថ្មី បានគូសបញ្ជាក់ថា គំរោងសាងសង់អាកាសយានដ្ឋានអន្តរជាតិភ្នំពេញថ្មី ត្រូវបានសាងសង់លើផ្ទៃដីទំហំ ២.៦០០ហិកតា ស្តិតនៅខេត្តកណ្តាល និងខេត្តតាកែវ ដោយក្នុងនោះទំហំដី នៅខេត្តកណ្តាល ២.២២៧ក្បាលដី ស្មើនិង២.៤៤១ហិកតា និងខេត្តតាកែវ៣៦០ក្បាល ស្មើនិង១៥៨ហិកតា។
គំរោងសាងសង់ អាកាសយានដ្ឋាន អន្តរជាតិភ្នំពេញថ្មីនេះ មានទុនវិនិយោគ ១.៥០០លានដុល្លារ ជាការវិនិយោគរបស់ក្រុមហ៊ុនសាជីវកម្មក្រៅប្រទេសកម្ពុជា(OCIC) ដោយដំណាក់កាលទី១ និងត្រូវបញ្ចប់ការសាងសង់ ក្នុងឆ្នាំ២០២២។
ជាមួយគ្នានោះ រាជរដ្ឋាភិបាល បានដោះស្រាយ បញ្ហា សំណង់មិនរៀបរយ ជាមួយប្រជាជន នៅក្នុងដីព្រលានយន្តហោះថ្មី សរុបចំនួន១៧៦គ្រួសារ ក្នុងនោះ១១គ្រួសារ បានទទួលប្រាក់ គោលនយោបាយចំនួន២.០០០ដុល្លារ ក្នុងមួយគ្រួសារ និង១៦៥គ្រួសារទៀត ទទួលយកការដោះដូរ ទៅកន្លែងផ្សេងទៀតសំរា់ប់សាងសង់ លំនៅដ្ឋានរស់នៅ៕
