ថៃ៖ ជនជាតិមីយ៉ាន់ម៉ាភៀសខ្លួនចំនួន ៥៨ នាក់ត្រូវបានប៉ូលីសថៃចាប់ខ្លួនបន្ទាប់ពីបានឆ្លងដែនខុសច្បាប់ចូលទៅក្នុងស្រុក Thong Pha Phum កាលពីព្រឹកថ្ងៃព្រហស្បតិ៍។លោក Chakrit Tanpiroon មេស្រុក Thongpha Phum បាននិយាយថា មន្ត្រីមូលដ្ឋាន ទាហាន និងប៉ូលីសបានរកឃើញបុរស ៤៥ នាក់ និងស្ត្រី ១៣ នាក់កំពុងលាក់ខ្លួននៅក្នុងតំបន់ព្រៃក្បែរអាងស្តុកទឹកមួយក្នុងឃុំ Tha Khanum នៃស្រុកព្រំដែននៅម៉ោងប្រហែល ៦ ព្រឹកហើយអ្នកទាំងអស់នោះជាជនជាតិមីយ៉ាន់ម៉ា ដោយគ្មានឯកសារឆ្លងដែនច្បាស់លាស់។
បើតាមប៉ូលីសថៃបានឲ្យដឹងថាក្នុងពេលសាកសួរ ពួកគេបានប្រាប់សមត្ថកិច្ចថា ពួកគេបានបង់ប្រាក់ពី ១៥,០០០ ទៅ ២៥,០០០ បាត ឲ្យមេខ្យល់ដែលរកការងារឲ្យធ្វើនៅក្នុងប្រទេសថៃ បន្ទាប់មកអ្នកទាំងអស់ត្រូវបានប្រគល់ឱ្យនគរបាលមូលដ្ឋានដើម្បីចាត់ការតាមច្បាប់ ។ នេះជាការចាប់ខ្លួនអ្នកឆ្លងដែនខុសច្បាប់ជាលើកទីពីរនៅក្នុងតំបន់ក្នុងរយៈពេលជាងមួយសប្តាហ៍ប៉ុណ្ណោះ។ កាលពីថ្ងៃទី១៣ ខែមីនា អាជ្ញាធរបានឃាត់ខ្លួនជនចំណាកស្រុកខុសច្បាប់ចំនួន២២នាក់ ក្នុងនោះប្រុស១៧នាក់ និងស្ត្រី៥នាក់ នៅស្រុកថោងផាភូមិ៕
