.png?1741682398)
ភ្នំពេញ៖ លោក ប្រាក់ សុខុន រដ្ឋមន្រ្តីការបរទេសកម្ពុជា និងជាប្រេសិតពិសេសរបស់ប្រធានអាស៊ានស្ដីពីមីយ៉ាន់ម៉ា នៅថ្ងៃទី ២១ មីនានេះ បានដឹកនាំគណៈប្រតិភូទៅបំពេញទស្សនកិច្ចការងារនៅមីយ៉ាន់ម៉ាចាប់ពីថ្ងៃទី ២១ដល់ថ្ងៃទី ២៣ ខែមីនា ឆ្នាំ២០២២។ដំណើរទេស្សនកិច្ចនេះ ធ្វើឡើងតបតាមការអញ្ជើញរបស់ក្រុមប្រឹក្សារដ្ឋបាលរដ្ឋនៃប្រទេសមីយ៉ាន់ម៉ា ដើម្បីស្វែងការបញ្ចប់អំពើហិង្សានៅទីនោះ។
អញ្ជើញអមដំណើរ ឧបនាយករដ្ឋមន្ត្រី ប្រាក់ សុខុន រួមមាន លោកទេសរដ្ឋមន្រ្តី ចម ប្រសិទ្ធ រដ្ឋមន្រ្ដីក្រសួងឧស្សាហកម្ម វិទ្យាសាស្រ្ដ បច្ចេកវិទ្យា និងនវានុវត្តន៍, លោក លឹម ចុក ហ៊ុយ អគ្គលេខាធិការអាស៊ាន, លោក លី យ៉ាម មីង នាយកប្រតិបត្តិនៃមជ្ឈមណ្ឌលសម្របសម្រួលអាស៊ាន ដើម្បីជំនួយមនុស្សធម៌ និងការគ្រប់គ្រងគ្រោះមហន្តរាយ (AHA Centre) និងមន្រ្ដីជាន់ខ្ពស់របស់រាជរដ្ឋាភិបាលមួយចំនួន ព្រមទំាងបុគ្គលិករបស់លេខាធិការដ្ឋានអាស៊ាន និង AHA Centre ផងដែរ។
គួរបញ្ជាក់ថា ក្នុងសន្និសីទសារព័ត៌មាននាថ្ងៃទី ១៧ ខែកុម្ភៈ បន្ទាប់ពីបិទបញ្ចប់កិច្ចប្រជុំចង្អៀតរដ្ឋមន្ត្រីការបរទេសអាស៊ានដែលកម្ពុជាធ្វើជាម្ចាស់ផ្ទះលោក ប្រាក់ សុខុន បានថ្លែងថា គម្រោងបំពេញទស្សនកិច្ចនេះ គឺធ្វើយ៉ាងណា ដើម្បីបានជួបសន្ទនាជាមួយភាគីពាក់ព័ន្ធ ប៉ុន្តែមិនគ្រប់ភាគីទាំងអស់នោះទេ ដោយក្នុងនោះលោកនឹងស្នើសុំជួបជាមួយមេដឹកនាំយោធាលោក មីន អ៊ុងឡាំង (Min Aung Hlaing) និង រដ្ឋមន្ត្រីការបរទេសមីយ៉ាន់ម៉ា លោក វុនណា ម៉ោងលីន (Wu-nna Maung Lwin) និងឥស្សរជនផ្សេងៗទៀតដែលខាងទីក្រុងណៃពិដោនឹងរៀបចំសម្រួលឱ្យជួប៕
.png?1744178821)
