សម្តេច ហ៊ុន សែននឹងទៅទស្សនកិច្ចនៅមីយ៉ាន់ម៉ាស្អែកនេះ ទោះមានការគំរាមកំហែង

ភ្នំពេញ៖ សម្តេច​នាយក​រដ្ឋមន្រ្តី ​ហ៊ុន សែន ​នៅថ្ងៃទី ៧ មករានេះ នឹងដឹកនាំគណៈប្រតិភូជាន់ខ្ពស់អញ្ជើញទៅបំពេញ ទស្សនកិច្ចនៅសាធារណរដ្ឋសហភាពមីយ៉ាន់ម៉ារយៈពេល២ថ្ងៃចាប់ពីថ្ងៃទី០៧ ដល់ថ្ងៃទី០៨ ខែមករា ឆ្នាំ២០២២។ជាដំណើរទស្សនកិច្ច រៀបចំឡើងស្របពេលមកអន្តរជាតិមួយចំនួន​រិះគន់​ និង មានការគំរាមកំហែងផ្សេងៗ។

ដំណើរទស្សនកិច្ចរបស់ប្រមុខរាជរដ្ឋាភិបាលកម្ពុជានេះ នឹងត្រូវអមដំណើរដោយ ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និង សហប្រតិបត្តិការអន្តរជាតិ និងឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងមន្ត្រី ជាន់ខ្ពស់នៃរាជរដ្ឋាភិបាលកម្ពុជាមួយចំនួនទៀត។

ក្នុងដំណើរទស្សនកិច្ចនោះ សម្តេច ហ៊ុន សែន នឹង​​ជជែក​ជាមួយ​ឧត្តមសេនីយ៍ មីន អ៊ុងឡាំង ​Min Aung Hlaing​ មេដឹកនាំ​យោធា​ដែល​ធ្វើ​រដ្ឋ​ប្រហារ​ទម្លាក់​មេ​ដឹកនាំ​ប្រជា​ធិបតេយ្យ​ កាល​ពី​ដើម​ខែ​កុម្ភៈ​ ឆ្នាំ​២០២១។

ម្លោះហើយបានជា គម្រោងដំណើរទស្សកិច្ចរបស់សម្តេច ហ៊ុន សែន ទៅកាន់ភូមាស្អែក បានធ្វើឲ្យប្រជាពលរដ្ឋភូមាមួយចំនួន មានការផ្ទុះកំហឹង និងសម្តែងការមិនពេញចិត្ត ព្រមទាំងយករូបថតសម្តេច មកជាន់ឈ្លីនឹងជើង និង ដុតកម្ទេចចោល។ជាងនេះទៅទៀតនៅថ្ងៃទី៣១ ខែធ្នូ ឆ្នាំ២០២១ មានករណីបំផ្ទុះគ្រាប់បែកច្នៃនៅក្បែរស្ថានទូតកម្ពុជាក្នុងទីក្រុងយ៉ាំងហ្គោន ប្រទេសមីយ៉ាន់ម៉ា ដែលកម្ពុជាចាត់ទុកថាជាការគំរាមគំហែង។

តែយ៉ាងណាក៏ដោយ លោកប្រមុខការទូតកម្ពុជា បានអះអាងថា កម្ពុជានឹងធ្វើអ្វី ដែលល្អបំផុតសម្រាប់ប្រជាជនមីយ៉ាន់ម៉ា និងអាស៊ានទាំងមូល ហើយសង្ឃឹមថា បទពិសោធរបស់កម្ពុជា ក្នុងការស្វែងរកសន្តិភាព និងការបង្រួបបង្រួមជាតិ នឹងអាចជួយដល់មីយ៉ាន់ម៉ាបាន។សម្រាប់កម្ពុជា វិបត្តិនៅមីយ៉ាន់ម៉ា គឺជាចំណោទបញ្ហាដ៏ធំ និងមានភាពស្មុគស្មាញ ដោយសារប្រវត្តិសាស្រ្តនយោបាយ គួបផ្សំនឹងតួនាទីដ៏មានឥទ្ធិពលរបស់យោធាជាដើម៕