ភ្នំពេញ៖ ប្រមុខការទូតចិនលោក វ៉ាង យី នឹងមកបំពេញទស្សនកិច្ចក្នុងប្រទេសកម្ពុជានៅថ្ងៃទី១២ កញ្ញានេះ ដោយគ្រោងជួបប្រមុខរដ្ឋាភិបាលកម្ពុជា និងមន្ត្រីជាន់ខ្ពស់មួយចំនួនទៀត។ក្នុងដំណើរទស្សនកិច្ចនោះ ពហុកីឡដ្ឋានមរតកតេជោ តម្លៃជិត១៦០លានដុល្លារ នឹងត្រូវសម្ពោធដាក់ឲ្យប្រើប្រាស់នៅរសៀលថ្ងៃទី ១២ ខែកញ្ញា ឆ្នាំ២០២១ ដោយមានវត្តមានចូលរួមពី លោក វ៉ាង យី សម្តេច ហ៊ុន សែន។
ក្នុងដំណើរទស្សនៈកិច្ចរបស់លោក វ៉ាង យី និង សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នឹងអញ្ជើញជាអធិបតីភាពក្នុងពិធីប្រគល់-ទទួល ពហុកីឡដ្ឋានជាតិមរតកតេជោ ជាជំនួយឥតសំណងរបស់ចិនជូនកម្ពុជា។ពិធីនេះគ្រោងនឹងធ្វើឡើងនៅរសៀលថ្ងៃអាទិត្យទី១២ ខែកញ្ញានេះ។
អគ្គលេខាធិការនៃគណៈកម្មការជាតិអូឡាំពិកកម្ពុជា ឯកឧត្តម វ៉ាត់ ចំរើន បានគូសបញ្ជាក់ ការផ្ដល់កិត្តិយសចូលរួមសម្ពោធពហុកីឡដ្ឋានមរតកតេជោ ពីសំណាក់លោក វ៉ាង យី ដែលជាមន្ត្រីដ៏មានឥទ្ធិពលខ្លាំងរបស់ចិននេះ នឹងធ្វើឲ្យពហុកីឡដ្ឋានមរតកតេជោ កាន់តែល្បីខ្ចរខ្ចាយ និងកាន់តែធ្វើឲ្យមានការចាប់អារម្មណ៍ ពីសំណាក់ពិភពលោកមកកម្ពុជា បន្ថែមទៀត។
គួរបញ្ជក់ថា ពហុកីឡដ្ឋានជាតិមរតកតេជោនេះ បានបើកការដ្ឋានសាងសង់ ដំណាក់កាលទី១ កាលពីថ្ងៃទី១២ ខែមេសា ឆ្នាំ២០១៣ ក្រោមអធិបតីភាព សម្តេចតេជោ ហ៊ុន សែន នាយករដ្ឋមន្ត្រីកម្ពុជា។ ពហកីឡដ្ឋាននេះ មានទីតាំងស្ថិតនៅសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ ដោយសាងសង់លើផ្ទៃដីទំហំជាង ៨៥ហិកតា មានចម្ងាយ ១២គីឡូម៉ែត្រ ពីវត្តភ្នំ។
ពហុកីឡាដ្ឋានជាតិមរតកតេជោ នឹងត្រូវសាងសង់លើផ្ទៃដី ទំហំជាង ៨៥ ហិកតា ក្នុងតំបន់អភិវឌ្ឍន៍របស់លោកឧកញ៉ា លី យ៉ុងផាត់ សមាជិកព្រឹទ្ធសភា និងជាមហាសេដ្ឋី អ្នកជំនួញ ចូលហ៊ុននឹងអ្នកជំនួញថៃ។ សំណង់ពហុកីឡាដ្ឋានជាតិមរតកតេជោ នឹងត្រូវសាងសង់ជា ៣ ដំណាក់កាល។ ដំណាក់កាលទី១ មានរយៈពេលសាងសង់ ៣២ ខែ មានមណ្ឌលកីឡាក្នុងសាលមណ្ឌលកីឡាហែលទឹក សាលហាត់កីឡាប្រយុទ្ធ អគារស្នាក់នៅ អាហារដ្ឋាន និងទីលានហ្វឹកហាត់ក្រៅអគារ។
ក្នុងដំណាក់កាលទី១នេះ ត្រូវចំណាយថវិកាជិត ៣៩ លានដុល្លារ។ ដំណាក់កាលទី២ ប្រើរយៈពេល ៣៦ ខែ ដើម្បីសាងសង់កីឡាដ្ឋាន ដែលអាចទទួលទស្សនិកជនប្រមាណជាង ៧ ម៉ឺននាក់ និងដំណាក់កាលទី៣ ប្រើរយៈពេល ៤០ ខែ មានសាលវេជ្ជសាស្ត្រ វិទ្យាសាស្ត្រកីឡា និងសាលហាត់សាច់ដុំ សាលកាយសម្ព័ន្ធ សាលកីឡាបាញ់កាំភ្លើង មជ្ឈមណ្ឌលកីឡាហុកគី និងសាលកីឡាប្រពៃណី៕
