ភ្នំពេញ៖ ភាគីជប៉ុនថា បុរសជនជាតិជប៉ុន ពិតជាមានផ្ទុកមេរោគ Covid-19 នៅពេលទៅដល់ប្រទេសជប៉ុន។នេះបើតាមការអះអាងរបស់លោក ម៉ម ប៊ុនហេង រដ្ឋមន្រ្តីក្រសួងសុខាភិបាលកម្ពុជា បានថ្លែងបញ្ជាក់ប្រាប់នាយកប្រតិបត្តិអង្គភាពព័ត៌មាន Fresh News។
រដ្ឋមន្រ្តីក្រសួងសុខាភិបាលកម្ពុជា បានថ្លែងថា ក្រសួងសុខាភិបាលបានទទួលព័ត៌មានច្បាស់លាស់ហើយពីខាងភាគីជប៉ុនថា បុរសជនជាតិជប៉ុន ពិតជាមានផ្ទុកមេរោគ Covid-19 នៅពេលទៅដល់ប្រទេសជប៉ុន ហើយបច្ចុប្បន្នក្រសួង និងអាជ្ញាធរខេត្តសៀមរាប កំពុងធ្វើការលើករណីនេះដោយ តម្លាភាពបំផុត ដើម្បីជៀសវាងការភ័យខ្លាចពីសំណាក់ប្រជាពលរដ្ឋ និងធ្វើការប្រកបដោយភាពត្រឹមត្រូវបំផុតទៅតាមនីតិវិធីរបស់អង្គការសុខភាពពិភពលោក។
លោករដ្ឋមន្រ្តីបានបន្ថែមថា នៅពេលនេះក្រុមមន្រ្តីសុខាភិបាល និងអាជ្ញាធរមូលដ្ឋាន កំពុងស្រាវជ្រាវតាមដានយ៉ាងយកចិត្តទុកដាក់ជាទីបំផុត ដើម្បីរកអ្នកដែលមានទំនាក់ទំនង និងនៅក្បែរបុរសជនជាតិជប៉ុននោះ ដើម្បីធ្វើការត្រួតពិនិត្យ និងដាក់ឲ្យនៅដាច់ដោយឡែកពីគេ។
សូមបញ្ជាក់ថា បុរសជប៉ុនដែលផ្ទុកខូវិដ ១៩ បានស្នាក់នៅកម្ពុជាយ៉ាងតិចណាស់ចំនួន៥ថ្ងៃ មុនចាកចេញនៅថ្ងៃទី ៣ ខែមីនា ។ឯកអគ្គរាជទូតខ្មែរប្រចាំប្រទេសជប៉ុន បានអោយដឹងថា បុរសជនជាតិជប៉ុន ដែលមិនបង្ហាញអត្តសញ្ញាណនោះ គឺបានរស់នៅកម្ពុជាយ៉ាងតិចណាស់ចំនួន ៥ថ្ងៃ គឺចូលមកកម្ពុជា នៅថ្ងៃទី ២៨ ខែ កុម្ភៈ និង ចាកចេញពីព្រលានយន្តហោះខេត្តសៀមរាប នៅថ្ងៃទី ៣ ខែមីនា ។
នៅក្នុងអម្លុងពេលស្នាក់នៅកម្ពុជាបុរសជនជាតិជប៉ុន អាយុជាង ៤០ឆ្នាំ រូបនោះក៍បានទៅពិនិត្រជំងឺនៅមន្ទីរពេទ្យនៅស្រុកខ្មែរដែរ តែមិនបានបង្ហាញឈ្មោះមន្ទីរពេទ្យនោះទេ៕
.JPG?1634100985)
