ព្រះត្រៃបិដក១,៦៥០ក្បាលនិងវចនានុក្រម២៨៦ក្បាលត្រូវបានប្រគេនដល់វត្តនានានៅទឹកដីខ្មែរក្

ខ្មែរក្រោម៖ សម្តេច ហ៊ុន សែន និងសម្តេចកិត្តិព្រឹទ្ធបណ្ឌិត បានប្រគេនព្រះត្រៃបិដកចំនួន ១៥ឈុត ស្មើនឹង ១,៦៥០ក្បាល និងវចនានុក្រមចំនួន ២៨៦ក្បាល ដល់វត្តនានានៅទឹកដីខ្មែរក្រោម។ ព្រះត្រៃបិដក និងវចនានុក្រមនេះ បានទៅកាន់ទឹកដីខ្មែរក្រោមកាលពីថ្ងៃទី៣ ខែមីនា ឆ្នាំ២០២៥ នឹងក្លាយជាចំណែកដ៏សំខាន់ក្នុងការរក្សាគ្រឹះនៃ ព្រះពុទ្ធសាសនា នឹង អក្សរសាស្ត្រខ្មែរលើទឹកដីខ្មែរក្រោម។

យោងតាមលោក សាន សាង ទីប្រឹក្សាសម្តេច ហ៊ុន សែន ប្រធានព្រឹទ្ធសភាកម្ពុជា ព្រះត្រៃបិដក និងវចនានុក្រម ទៅប្រគេនដល់ដល់សាលាគណ ក៏ដូចជាវត្តចំនួន៧រួចហើយរួមមាន៖ វត្តពោធិសាលរាជ ហៅវត្តកំពង់ ស្ថិតនៅក្រុងត្រាវិញ, វត្តសង្ឃមង្គល ហៅវត្តកំពង់រលីង ស្ថិតក្នុងខេត្តលង់ហោរ, វត្តឃ្លាំង ស្ថិតនៅស្រុកត្រាំង ខេត្តឃ្លាំង, វត្តខេមរប្បភា ហៅវត្ត៩០០០ ស្ថិតនៅខេត្តហូវយ៉ាង, វត្តមុនីរង្សី ស្ថិតនៅខេត្តព្រែកឫស្សី, វិជ្ជាស្ថានពុទ្ធសាសនាខ្មែរ ស្ថិតនៅខេត្តព្រែកឫស្សី និងប្រគេនដល់សាលាគណ នៅខេត្តបារាជ (អាងយ៉ាង)។

បើតាមលោក សាន សាង ការដង្ហែព្រះត្រៃបិដក និងវចនានុក្រមខ្មែរ ទៅកាន់ទីអារាមនៅលើទឹកដីខ្មែរក្រោមធ្លាប់មាននាពេលកន្លងទៅ តាមរយៈព្រះសង្ឃ ក៏ដូចជាប្រជាពុទ្ធបរិស័ទនៅកម្ពុជា។ ប៉ុន្តែសម្រាប់ថ្នាក់ដឹកនាំរបស់កម្ពុជា គឺមិនធ្លាប់មាននោះឡើយ។ព្រះត្រៃបិដក និងវចនានុក្រមទាំងនេះ ជាចំណែកដ៏សំខាន់ជួយដល់ការថែរក្សាពុទ្ធសាសនា នឹង អក្សរសាស្ត្រខ្មែរដែលជាមរតកដូនតាខ្មែរលើទឹកដីខ្មែរក្រោមឱ្យគង់វង្សជានិច្ចនិរន្តរ៍។

គួរបញ្ជាក់ថា ថ្នាក់ដឹកនាំកម្ពុជា ធ្លាប់បានរៀបចំជាអង្គកឋិនទានមហាសាមគ្គីគ្រួសារខ្មែរ កាលពីថ្ងៃទី០៣ និងទី០៤ ខែវិច្ឆិកា ឆ្នាំ២០២៤ ទទួលបានបច្ច័យសរុបចំនួនជាង ៦០ប៊ីលានដុង(២,៣លានដុល្លារ) ក្នុងនោះព្រះមហាក្សត្រខ្មែរ និង ព្រះមហាក្សត្រីបានចូលបច្ច័យចំនួន ២ម៉ឺនដុល្លារ។ បច្ច័យដែលបានមកពីអង្គកឋិនទានដង្ហែទៅកាន់វត្តកម្ពុជាក្រោមនេះ ត្រូវបានបែងចែកជា៧ផ្នែក។