ខេត្តកំពត៖ រដ្ឋបាលខេត្តកំពត បានប្រមូល«បញ្ជីរាយមុខសេវាកម្មទេសចរណ៍»ដើម្បីពិនិត្យមើលតម្លៃឲកាន់តែប្រសើរ ខណៈថ្មីៗនេះ មានការជជែកវែកញែកជាខ្លាំងអំពីតម្លៃសេវាកម្ម និង អាហារ នៅបណ្តាខេត្តនានាមួយចំនួន ដែលបានធ្វើឲមានផលប៉ះពាល់ដល់វិស័យទេសចរណ៏។ រដ្ឋបាលខេត្តកំពត បានព្យាយាមក្នុងការរក្សានូវតម្លៃ និង សេវាកម្មនៅក្នុងខេត្តឲមានការប្រសើរឡើង។នេះបើយោងតាមសេចក្តីជូនដំណឹងរបស់រដ្ឋបាលខេត្តកំពត។
យោងតាមសេចក្តីជូនដំណឹងរបស់រដ្ឋបាលខេត្តកំពត បានបញ្ជាក់ថា រដ្ឋបាលខេត្តកំពតសហការជាមួយមន្ទីរទេសចរណ៍ខេត្តកំពត បានប្រមូលបញ្ជីរាយមុខសេវាកម្មទេសចរណ៍គ្រប់ប្រភេទទាំងអស់នៅទូទាំងខេត្តកំពត យកមកតម្កល់ និងត្រួតពិនិត្យឲបានច្បាស់លាស់ និងត្រឹមត្រូវ ដើម្បីជៀសវៀងរាល់ករណីមិនប្រក្រតីណាមួយកើតឡើងទៅលើតម្លៃនៃការស្នាក់នៅ ហូបចុក សម្រាប់ថ្ងៃបុណ្យទាន និងថ្ងៃធម្មតា។
រដ្ឋបាលខេត្តក៏បានជម្រាបជូនដល់ប្រជាពលរដ្ធ និងភ្ញៀវទេសចរគ្រប់រូបដែលមកកម្សាន្តនៅខេត្តកំពតឲជ្រាបថា រាល់ការកត់សំគាល់ករណីតម្លៃស្នាក់នៅ អាហារ មានការមិនប្រក្រតី ឫមិនសាកសមតម្លៃ សូមរាយការណ៏ដោយការថតឈ្មោះទីតាំង និងតម្លៃ រួចផ្ញើមកកាន់គេហទំព័ររដ្ឋបាលខេត្តកំពត ដើម្បីមានការត្រួតពិនិត្យឡើងវិញ ដើម្បីទទួលបានបទពិសោធន៏ល្អដំណើរក្នុងខេត្តកំពត និង វិស័យទេសចរណ៏ល្អ៕
