.png?1741682398)
កំពង់ឆ្នាំង៖ លោក វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានបញ្ជាក់យ៉ាងច្បាស់ថា កម្ពុជាមិនចងសម្ព័ន្ធយោធា ឬ ចូលក្នុងកិច្ចព្រមព្រៀងយោធាណាមួយ ដែលមិនស្របនឹងអព្យាក្រឹតភាពរបស់ខ្លួនឡើយ កម្ពុជាមិនអនុញ្ញាតឱ្យមានមូលដ្ឋានយោធាបរទេសនៅលើទឹកដីរបស់ខ្លួន ហើយក៏មិនអនុញ្ញាតឱ្យមានមូលដ្ឋានយោធារបស់ខ្លួននៅបរទេសដែរ លើកលែងតែក្នុងក្របខ័ណ្ឌ នៃសំណូមពររបស់អង្គការសហប្រជាជាតិ។ ការថ្លែងបែបនេះធ្វើឡើងក្នុងពិធីបើក សមយុទ្ធនាគមាសឆ្នាំ២០២៤ រវាងកងយោធាកម្ពុជា-ចិន នៅព្រឹកថ្ងៃនេះ។
លោក វង្ស ពិសេន បានលើកឡើងថា កម្ពុជាប្រកាន់ខ្ជាប់ជានិច្ចនូវនយោបាយអព្យាក្រឹតអចិន្ត្រៃយ៍ មិនចូលបក្សសម្ព័ន្ធ និងរួមរស់ដោយសន្តិសហវិជ្ជមានជាមួយប្រទេសជិតខាង និងប្រទេសទាំងអស់នៅលើសកលលោក។ កម្ពុជាមិនឈ្លានពាននិង មិនជ្រៀតជ្រែកកិច្ចការផ្ទៃក្នុងប្រទេសដទៃ ដោះស្រាយរាល់បញ្ហាដោយសន្តិវិធី និងគោរពផលប្រយោជន៍គ្នាទៅវិញទៅមក។ កម្ពុជាប្រឆាំង ដាច់ខាតការជ្រៀតជ្រែកពីបរទេស ចូលក្នុងកិច្ចការផ្ទៃក្នុងប្រទេស់របស់ខ្លួន ទោះបីក្រោមរូបភាពណាក៏ដោយ។
លោកអគ្គមេបញ្ជាការ បានបញ្ជាក់ថាកម្ពុជាមិនចងសម្ព័ន្ធយោធា ឬ ចូលក្នុងកិច្ចព្រមព្រៀងយោធាណាមួយ ដែលមិនស្របនឹងអព្យាក្រឹតភាពរបស់ខ្លួនឡើយ កម្ពុជាមិនអនុញ្ញាតឱ្យមានមូលដ្ឋានយោធាបរទេសនៅលើទឹកដីរបស់ខ្លួន ហើយក៏មិនអនុញ្ញាតឱ្យមានមូលដ្ឋានយោធារបស់ខ្លួននៅបរទេសដែរ លើកលែងតែក្នុងក្របខ័ណ្ឌ នៃសំណូមពររបស់អង្គការសហប្រជាជាតិ។ ក្នុងនាមជារដ្ឋអធិបតេយ្យមួយ កម្ពុជារក្សាសិទ្ធិទទួលយកជំនួយបរទេសជា សម្ភារៈយោធា អាវុធ គ្រាប់រំសេវ៉ ការហ្វឹកហ្វឺនកម្លាំងប្រដាប់អាវុធ និង ជំនួយផ្សេងៗទៀត ដើម្បីការពារខ្លួន និងធានាសណ្តាប់ធ្នាប់ សន្តិសុខ សាធារណៈនៅផ្ទៃក្នុងប្រទេស។
គួរបញ្ជាក់ថា សមយុទ្ធយោធារវាងកម្ពុជា និង ចិន មានរយៈពេល១៥ថ្ងៃគឺចាប់ពីថ្ងៃទី១៦ ដល់ថ្ងៃទី៣០ ខែឧសភា ឆ្នាំ២០២៤ នៅភ្នំជុំសែនរីករាយ ខេត្តកំពង់ឆ្នាំង និងខេត្តព្រះសីហនុ ក្នុងគោលបំណងផ្លាស់ប្តូរបទពិសោធន៍គ្នាទៅវិញទៅមក នៃការទប់ស្កាត់ និងបង្រ្កាប់អំពើភេរវកម្ម ការប្រឆាំងដ្រូនស៊ើបការរបស់សត្រូវ និងដើម្បីបង្កើនសមត្ថភាពកងទ័ពនៃប្រទេសទាំងពីរឲ្យកាន់តែល្អប្រសើរបន្ថែមទៀត ក្នុងកិច្ចការពារជាតិ ការពារសន្តិសុខក្នុងតំបន់ និងពិភពលោក។
សមយុទ្ធយោធារួមគ្នានេះ មានការចូលរួមពីកងទ័ពកម្ពុជា-ចិន សរុបចំនួន ២០៧៥នាក់ ក្នុងនោះកងយុទ្ធពលខេមរភូមិន្ទចំនួន ១៣១៥នាក់ និង កងទ័ពរំដោះប្រជាជនចិនចំនួន ៧៦០នាក់។ នេះជាឆ្នាំទី៦ហើយដែលកម្ពុជា និង ចិន រៀបចំសមយុទ្ធរួមគ្នា ក្រោយចាប់ផ្តើមដំណើរការតាំងពីឆ្នាំ ២០១៦។ កាលពីឆ្នាំ២០២៣ កម្ពុជានិង ចិនក៏បានធ្វើ សមយុទ្ធនាគមាស នេះម្តងហើយ បន្ទាប់ពីខកខានរយៈពេលពីរឆ្នាំជាប់គ្នាដោយសារវិបត្តិជំងឺកូវីដ១៩។ សមយុទ្ធរួមគ្នានេះ ត្រូវបានបញ្ជាក់ថា ដើម្បីពង្រឹងសន្តិសុខទប់ស្កាត់អំពើភេរវកម្មក្នុងប្រទេសនីមួយៗ និងនៅក្នុងតំបន់ មិនមានគោលបំណងគំរាមកំហែង ឬធ្វើឲ្យប៉ះពាល់ប្រទេសណាមួយឡើយ៕
