![](https://cdn.cc-times.com/kh.cc-times.com/media/47042/large/242480182_1511845469177158_6718628164314812005_n.jpeg?1713257045)
ភ្នំពេញ៖បុរសខ្លាំងរបស់កម្ពុជាដែលដឹកនាំប្រទេសពីសង្គ្រាមរាំងរៃរហូតមាន សុខសន្តិភាព គឺសម្តេច ហ៊ុន សែន បច្ចុប្បន្នជាប្រធានព្រឹទ្ធសភា នៅថ្ងៃទី ១៦ មេសា ឆ្នាំ២០២៤នេះ បានបន្តអំពាវនាវដល់ប្រជាពលរដ្ឋកម្ពុជា រួបរួមគ្នាការពារ និង ថែរក្សាសុខសន្តិភាព។ការអំពាវនាវនេះ ធ្វើឡើងចំពេលប្រជាជនកម្ពុជាកំពុងតែសប្បាយរីករាយជាមួយពិធីបុណ្យចូលឆ្នាំថ្មី ប្រពៃណីជាតិខ្មែរ និង ស្ថានការណ៍ពិភពលោកកំពុងមានការព្រួយបារម្ភពីការផ្ទុះសង្គ្រាមនៅតំបន់ដើមបូព៌ា។
ក្នុងនាមជាមេដឹកនាំកាន់តំណែងយូរជាងគេនៅលោកពិភពលោករយៈពេលជិត៤០ឆ្នាំ និង មានបទពិសោធន៍ជ្រៅជ្រះក្នុងការងាររដ្ឋការប្រមាណជាងកន្លះសតវត្ស សម្តេច ហ៊ុន សែន បានរំលឹកពីប្រវត្តិដ៏សែនឈឺចាប់របស់សម្តេច គឺខួប៤៩ឆ្នាំនៃការបាត់បង់កែវភ្នែកឆ្វេងរបស់សម្តេចដោយសារសង្គ្រាម។
បើតាមសម្តេច ហ៊ុន សែន កាលពី៤៩ឆ្នាំមុន នៅថ្ងៃនេះ សម្តេចកំពុងសន្លប់ និង បន្ទាប់ពីសន្លប់ច្រើនថ្ងៃពេលដឹងខ្លួនទើបដឹងថា ភ្នែកឆ្វេងពិការជាមួយភ្នែកស្តាំមើលឃើញមិនច្បាស់។សម្រាប់សម្តេច ជាយុវជនដែលមានអាយុ២៣ឆ្នាំ សម្តេចពិតជាមានការស្តាយស្រណោះកែវភ្នែករបស់សម្តេចពិការដោយសារសង្គ្រាម។
ដោយមូលហេតុនេះ ហើយទើបសម្តេច បានខិតខំបញ្ចប់សង្គ្រាមនាំមកនៅសន្តិភាពឯកភាពជាតិឯកភាពទឹកដីបង្កើតនូវការសប្បាយរីករាយជូនប្រជាជនដូចដែលប្រជាជនកម្ពុជា និង បន្តអំពាវនាវដល់ពលរដ្ឋទាំងអស់រួបរួមគ្នាការពារសន្តិភាពឲ្យខាងតែបាន។
ជាការកត់សម្គាល់ ការប្រកាសអំពាវនាវរបស់សម្តេច ហ៊ុន សែន ធ្វើឡើងចំពេលពលរដ្ឋកម្ពុជាកំពុងសប្បាយរីករាយជាមួយពិធី បុណ្យចូលឆ្នាំថ្មី ប្រពៃណីជាតិខ្មែរ និង ស្ថានការណ៍ពិភពលោកកំពុងមានការព្រួយបារម្ភជាខ្លាំងក្រោយពីប្រទេសអ៉ីរ៉ង់ នៅថ្ងៃទី ១៣ មេសា បើកការវាយប្រហារតាមរយៈបាញ់ដ្រូនជាច្រើនគ្រឿង និង មីស៊ីលជាច្រើនគ្រាប់ តម្រងទៅកាន់អ៉ីស្រាអែល ដើម្បីទុកជាការសងសឹង។បច្ចុប្បន្ននេះ គេនៅរង់ចាំការសម្រេចចិត្តរបស់អ៉ីស្រាអែល តើហ៊ានវាយបកទៅអ៉ីរ៉ង់វិញឬយ៉ាងណា?ប្រសិនវាយបកនោះសង្គ្រាមនៅដើមបូព៌ាកាន់តែរីករាលដាលទ្រុងទ្រាយធំ ជាក្តីបារម្ភសម្រាប់ពិភពលោកទាំងមូលបន្ថែមលោកសង្គ្រាមរុស្សីជាមួយអ៊ុយក្រែន៕
![](https://cdn.cc-times.com/kh.cc-times.com/media/47043/large/435121442_479613391060034_5317998575877738299_n.jpeg?1713257206)
![](https://cdn.cc-times.com/kh.cc-times.com/media/47046/large/436197511_479613311060042_7646941091223458918_n.jpeg?1713257207)
![](https://cdn.cc-times.com/kh.cc-times.com/media/47045/large/438229992_479613301060043_3723081358815232228_n.jpeg?1713257207)
![](https://cdn.cc-times.com/kh.cc-times.com/media/47044/large/438300176_479613297726710_7210389889774596059_n.jpeg?1713257206)