សៀមរាប៖ ប្រជាពលរដ្ឋប្រមាណជាង ២ ០០០ នាក់ បានចូលរួមចាប់ត្រីរួមគ្នាក្នុងត្រពាំងអភិរក្សបុរាណ នៅព្រឹកថ្ងៃទី១១ ខែកុម្ភៈ ដើម្បីយកត្រីមកធ្វើម្ហូបក្នុងពិធីបុណ្យឡើងមាឃ ឬឡើងអ្នកតា ទៅតាមប្រពៃណី និងទម្លាប់របស់អ្នកភូមិរស់នៅតំបន់រមណីយដ្ឋានអង្គរ។ពិធីនេះ បានបង្ហាញពីការ ប្រមូលផ្តុំទៅដោយបេតិកភណ្ឌរស់ដែលសម្បូរទាំងមរតកអរូបី និងរូបីជាច្រើន ហើយត្រូវបានអ្នកស្រុកអង្គរបន្តប្រតិបត្តិយ៉ាងខ្ជាប់ខ្ជួនរហូតមកទល់បច្ចុប្បន្ន។
ប្រជាពលរដ្ឋមកពីគ្រប់ទិសទី និងគ្រប់ស្រទាប់វណ្ណៈប្រមាណជាង ២ ០០០នាក់ បានចូលរួមពិធីចាប់ត្រីយ៉ាងសប្បាយរីករាយ ដោយមិនបានប្រកាន់វណ្ណៈឡើយ ។ពិធីចាប់ត្រីនេះត្រូវបានធ្វើឡើងរាល់ឆ្នាំទៅតាមទម្លាប់នៅក្នុងត្រពាំងបុរាណដែលអ្នកភូមិបានអភិរក្សត្រីរួមគ្នាទុកមិនឱ្យមានការនេសាទផ្តេសផ្តាសកន្លងមក ដោយទុកសម្រាប់ធ្វើពិធីចាប់ត្រីរួមគ្នាក្នុងឱកាសធ្វើពិធីបុណ្យឡើងមាឃ ឬឡើងអ្នកតា តែប៉ុណ្ណោះ។
អាជ្ញាធរជាតិអប្សរា បានគូសបញ្ជាក់ថា ជារៀងរាល់ឆ្នាំ ក្រោយពេលប្រមូលផលស្រូវរួចរាល់ ឱ្យតែមកដល់ខែមាឃ ប្រជាពលរដ្ឋរស់នៅក្នុងភូមិបង្កោង ឃុំអម្ពិល ស្រុកប្រាសាទបាគង ខេត្តសៀមរាប តែងតែនាំគ្នាប្រារព្ធពិធីចាប់ត្រីរួមមិនដែលខកខានជាលក្ខណៈសហគមន៍ គឺសម្រាប់តែសមាជិកក្នុងភូមិបង្កោងតែប៉ុណ្ណោះ ដើម្បីត្រៀមរៀបចំពិធីឡើងមាឃឬឡើងអ្នកតា តាមទំនៀមទម្លាប់ពីបុរាណ។ហើយពិធីនេះ បង្ហាញពីការ ប្រមូលផ្តុំទៅដោយបេតិកភណ្ឌរស់ដែលសម្បូរទាំងមរតកអរូបី និងរូបីជាច្រើន ហើយត្រូវបានអ្នកស្រុកអង្គរបន្តប្រតិបត្តិយ៉ាងខ្ជាប់ខ្ជួនរហូតមកទល់បច្ចុប្បន្ន។
គួរបញ្ជាក់ថា ការចាប់ត្រីរួមគ្នាធ្វើឡើងនៅត្រពាំងធំមួយដែលជាត្រពាំងបុរាណ មានទឹកខួបប្រាំងខួបវស្សា អ្នកភូមិបានអភិរក្សទុក ការពារមិនអនុញ្ញាតឱ្យនរណាម្នាក់ចូលមកនេសាទផ្តេសផ្តាស់ខុសពីខែមាឃនេះឡើយ លុះត្រាតែមានការសម្រេចគ្នាពីគណៈកម្មការរៀបចំបុណ្យជាមុន ហើយកំណត់ថ្ងៃនេសាទរួម ទើបអ្នកភូមិអាចទៅរកចាប់បាន។ ប៉ុន្តែត្រូវតែប្រើឧបករណ៍នេសាទបុរាណ រួមមានសំណាញ់ អង្រុត ឈ្នាង ជាដើម។
ចំពោះត្រីដែលចាប់បាននោះ មួយផ្នែកទុករួមសម្រាប់ធ្វើម្ហូបជាលក្ខណៈគ្រួសាររៀងៗខ្លួន មួយផ្នែកទៀតទុកសម្រាប់ធ្វើទឹកនំបញ្ចុក ម្ហូបអាហារ និងចង្ហាន់ជាដើម សម្រាប់ប្រគេនព្រះសង្ឃ នៅថ្ងៃធ្វើកិច្ចពិធីឡើងមាឃ ឬបុណ្យឡើងអ្នកតានៅសាលាឆាន់ក្នុងភូមិតាមទំនៀមបុរាណមិនដែលខកខាន៕
