សម្តេចទៀ បាញ់៖កម្ពុជានៅតែបន្តកិច្ចសហប្រតិបត្តិការយ៉ាងជិតស្និតជាមួយឥណ្ឌា

ភ្នំពេញ៖សម្តេច ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នៅថ្ងៃទី១០ ខែសីហា ឆ្នាំ២០២០ បានអនុញ្ញាតឱ្យ លោកជំទាវ Manika Jain ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋឥណ្ឌា ប្រចាំព្រះរាជាណាចក្រកម្ពុជា ចូលជួបសម្តែងការគួរសម នៅទីស្ដីការគណៈរដ្ឋមន្ត្រី។

នៅក្នុងជំនួបសម្តែងការគួរសមនេះ សម្តេចទៀ បាញ់ បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល ក្រសួងការពារជាតិ និង ស្ថានទូតឥណ្ឌាដែលតែងតែមានកិច្ចសហប្រតិបត្តិការយ៉ាងល្អជាមួយកម្ពុជា ក្នុងការជួយឧបត្ថម្ភគាំទ្រដល់ការកសាងអភិវឌ្ឍន៍ជាតិកម្ពុជា ជាពិសេសការផ្តល់ជំនួយសុខនហិតមីន សម្ភារៈ និងការជួយបណ្តុះបណ្តាលធនធានមនុស្សដល់ ខ.ភ.ម និងដល់កងរក្សាសន្តិភាពកម្ពុជា។

សម្តេចពិជ័យសេនា បានបញ្ជាក់ថា ឥណ្ឌាជាប្រទេសមួយដែលតែងមានកិច្ចសហប្រតិបត្តិការយ៉ាងស្និតជាមួយនឹងកម្ពុជា ជាពិសេសក្នុងកិច្ចប្រតិបត្តិការបំពេញបេសកកម្មរក្សាសន្តិភាពក្នុងក្របខណ្ឌអង្គការសហប្រជាជាតិនៅម៉ាលី ឥណ្ឌាក៏បានជួយដល់កងទ័ពមួកខៀវកម្ពុជា ដែលបោះជំរុំនៅជិតនោះផងដែរ។ សម្តេចពិជ័យសេនា ទៀ បាញ់ បានបញ្ជាក់ថា កម្ពុជានៅតែបន្តកិច្ចសហប្រតិបត្តិការ និងការរឹតចំណងមិត្តភាព និងសាមគ្គីភាពយ៉ាងជិតស្និតជាបន្តទៅទៀតជាមួយនឹងប្រទេសឥណ្ឌា។

ជាការឆ្លើយតបលោកជំទាវឯកអគ្គរដ្ឋទូត បានថ្លែងអំណរគុណចំពោះ សម្តេចពិជ័យសេនា ទៀ បាញ់ ដែលលើកឡើងអំពីកិច្ចសហប្រតិបត្តិការកងទ័ពនៃប្រទេសទាំងពីរ កម្ពុជានិងឥណ្ឌា ក៏ដូចជាកិច្ចសហប្រតិបត្តិការកងរក្សាសន្តិភាពទាំងពីរ។លោកជំទាវ បានបន្តថា ឥណ្ឌាបានតាំងចិត្តយ៉ាងខ្ពស់ក្នុងការសហការជាមួយនឹងកម្ពុជា ក្នុងកិច្ចការការពារជាតិ ក៏ដូចជាកិច្ចសហប្រតិបត្តិការកងរក្សាសន្តិភាព។ជាក់ស្តែងក្នុងថ្ងៃនេះក៏យើងមានពិធីសារចុះហត្ថលេខានូវទឹកប្រាក់ចំនួន ១.៥លានដុល្លា ដែលជាជំនួយឥណ្ឌទានពីប្រទេសឥណ្ឌា។

លោកជំទាវ បានបន្តថា ខណៈពេលនេះ យើងកំពុងពិនិត្យអំពីការស្នើសុំសុនខសម្រាប់ហិតគ្រឿងផ្ទុះ ដែលមុននេះ ឥណ្ឌាបានផ្តល់ឲ្យចំនួន ១៥ក្បាលរួចមកហើយ ហើយឥឡូវកំពុងពិភាក្សានិងជជែកគ្នា ដើម្បីផ្តល់ជូនដល់កម្ពុជាបន្ថែមទៀត។ ឥណ្ឌាមានការប្តេជ្ញាចិត្តក្នុងការបន្តធ្វើការជាមួយនឹងកម្ពុជា លើផ្នែកបណ្តុះបណ្តាលធនធានមនុស្ស នៅលើផ្នែកកងរក្សាសន្តិភាព និងកម្មវិធីជាច្រើនទៀតក្នុងការពង្រឹងមន្រ្តីរាជការ និងកងកម្លាំងប្រដាប់អាវុធ៕