ហ្សាកាតា៖សម្តេច ហ៊ុន ម៉ាណែត នាយករដ្ឋមន្ត្រីនៃកម្ពុជា កំពុងតែមានវត្តមានក្នុងកិច្ចប្រជុំកំពូលអាស៊ានលើកទី៤៣ និង កិច្ចប្រជុំកំពូលពាក់ព័ន្ធ នៅប្រទេសឥណ្ឌូណេស៊ី។ពិធីបើក កិច្ចប្រជ៉ំកំពូលអាស៊ានលើកទី៤៣កាលពីម្សិលមិញមេដឹកនាំអាស៊ាន បានប្រកាសស្វាគមន៍និងអបអរសាទរសម្តេច ហ៊ុន ម៉ាណែត ដែលជាប់ឆ្នោតក្លាយជានាយករដ្ឋមន្ត្រីថ្មីរបស់កម្ពុជា។
ដូចការគ្រោងទុកកិច្ចប្រជុំកំពូលអាស៊ានលើកទី ៤៣ និង កិច្ចប្រជុំកំពូលពាក់ព័ន្ធ បានចាប់ផ្តើមបើកជាផ្លូវការនៅទីក្រុងហ្សាកាតា ប្រទេសឥណ្ឌូនេស៊ី។ជាកិច្ចប្រជុំដែលប្រមូលផ្តុំទៅដោយមេដឹកនាំធំៗជុំវិញពិភពលោក ដើម្បីជួយជជែកគ្នាស្វែងរកដំណោះ ស្រាយលើបញ្ហានៅក្នុងតំបន់ និងដោះស្រាយបញ្ហាសេដ្ឋកិច្ចក្រោយវិបត្តិជំងឺកូវីដ -១៩។
ក្នុងកិច្ចប្រជុំកំពូលអាស៊ានលើកទី ៤៣ នៅឥណ្ឌូនេស៊ី ឆ្នាំ២០២៣នេះ ក៏មានវត្តមានជាលើកដំបូងរបស់សម្តេច ហ៊ុន ម៉ាណែត ក្នុងតំណែងជានាយករដ្ឋមន្ត្រីនៃកម្ពុជាថ្មី បន្ទាប់ពីសម្តេច ហ៊ុន សែន ដែលត្រូវជាឪពុក។សម្តេច ហ៊ុន ម៉ាណែត មានឈ្មោះជាមេដឹកនាំមានវ័យក្មេងជាងគេបង្អស់ ក្នុងចំណោមមេដឹកនាំកំពូលបច្ចុប្បន្នទាំង១០ រូបរបស់អាស៊ាន។
ក្នុងបើកកិច្ចប្រជ៉ំកំពូលអាស៊ាន លើកទី៤៣ កាលពីម្សិលមិញ សម្តេច ហ៊ុន ម៉ាណែត ត្រូវបានលោក ចូកូ វីដូដូ (Joko Widodo) ប្រធានាធិបតីនៃឥណ្ឌូនេស៊ី និងជាប្រធានអាស៊ាននៅឆ្នាំនេះ បានប្រកាសអបអរសាទរ និង ស្វាគមន៍វត្តមានរបស់សម្តេច ហ៊ុន ម៉ាណែត ក្នុងនាមជានាយករដ្ឋមន្ត្រីនៃប្រទេសកម្ពុជាថ្មី។
គួរបញ្ជាក់ថា នេះជាការបង្ហាញមុខជាលើកទីមួយបង្អស់លើឆាកអន្តរជាតិរបស់សម្តេច ហ៊ុន ម៉ាណែត និង ក្នុងនាមជាមេដឹកនាំកំពូលវ័យក្មេងជាងគេ ក្នុងជំនួបកំពូលអាស៊ាន ក្រោយឡើងកាន់តំណែងជានាយករដ្ឋមន្ត្រីកម្ពុជា។វត្តមាននេះ ដូចគ្នាទៅនឹងវត្តមានរបស់សម្តេចតេជោ ហ៊ុន សែន ពេលចូលរួមប្រជុំអាស៊ានលើកដំបូង នៅទីក្រុងម៉ានីឡា ប្រទេសហ្វីលីពីននាថ្ងៃទី ២៨ ខែ វិច្ចិការ ឆ្នាំ១៩៩៩ ក៏ជាមេដឹកនាំវ័យក្មេងជាងគេបង្អស់ ក្នុងចំណោមមេដឹកនាំកំពូល មានអាយុត្រឹមតែ ៤៧ ឆ្នាំតែប៉ុណ្ណោះ៕
