ប៉ារីស៖ប្រធានាធិបតីបារាំង លោក អេម៉ានុយអែល ម៉ាក្រុង នៅថ្ងៃទី ១៤ ធ្នូម្សិលមិញ បានសរសេរផ្សាយភាសាខ្មែរលើគេហទំព័ររផ្លូវការរបស់លោកផ្ទាល់ ស្តីពី ការចាប់ដៃជាមួយប្រទេសកម្ពុជាអំពាវនាវឱ្យរុស្ស៊ីបញ្ឈប់ការវាយប្រហារនៅប្រទេសអ៊ុយក្រែន។សារនេះបាននាំឱ្យមានការភ្ញាក់ផ្អើលជាខ្លាំងដល់ប្រជាជនកម្ពុជាជាពិសេសអ្នកលេងបណ្តាញសង្គម។
នៅក្នុងសារនោះ លោកម៉ាក្រុង បានសរសេរចាត់ទុក សង្គ្រាមធ្វើឡើងដោយរុស្ស៊ីនៅអ៊ុយក្រែន បានបង្កឱ្យមានការឈឺចាប់យ៉ាងច្រើន ហើយបានប្រកាសរួមគ្នាជាមួយកម្ពុជាអំពាវនាវឱ្យរុស្ស៊ីបញ្ឈប់ជាបន្ទាន់នូវការវាយប្រហារទៅលើប្រជាជន និង ហេដ្ឋារចនាសម្ព័ន្ធស៊ីវិល។
បន្ថែមពីនេះ លោកម៉ាក្រុង បន្តស្នើសុំដល់ដៃគូអន្តរជាតិចូលរួមជាមួយគ្នាការអំពាវនាវរុស្ស៊ីបញ្ឈប់ការវាយប្រហារនៅអ៊ុយក្រែន។សម្រាប់លោកម៉ាក្រុង ជំហរបស់កម្ពុជាលើបញ្ហាអ៊ុយក្រែនបែបនេះជាការបង្ហាញពីអត្តសញ្ញាណជាតិព្រមទាំងទំនាក់ទំនងបារាំងជាមួយកម្ពុជាកាន់តែស្និទ្ធស្នាលបន្ថែមទៀត។
ការលើកឡើងជាភាសាខ្មែររបស់ប្រធានាធិបតីបារាំងបែបនេះ ទទួលបានការចាប់អារម្មណ៍ជាខ្លាំងដល់ប្រជាពលរដ្ឋខ្មែរ និងបានសរសេរបញ្ចេញជាមតិផ្សេងៗគ្នាដោយចាត់ទុកថា វាជាកាយវិការដ៏ប្រពៃបំផុតបើទោះបីជារូបលោកប្រើ Google Translate ជំនួយក៏ដោយ។
ជាការកត់សម្គាល់ សាររបស់លោកម៉ាក្រុងយ៉ាងដូច្នេះ ធ្វើឡើងក្រោយពីសម្តេច ហ៊ុន សែន នាយករដ្ឋមន្រ្តីនៃកម្ពុជា បានជួបជាមួយប្រធានាធិបតីបារាំង លោក អេម៉ានុយអែល ម៉ាក្រុង នៅក្នុងទីក្រុងប៉ារីស។ជាជំជួបដែលរៀបចំឡើងដោយសម្តេច ហ៊ុន សែន ចាត់ទុកថា ក្នុងនាមជាដៃគូរសន្ទនាដ៏ស្និទ្ធស្នាល ស្មោះត្រង់ និង ជឿទុកចិត្តគ្នា៕
