Yearendyearend1140x150

បណ្ឌិតយ៉ង សាំងកុមារ សុំចូលCPPដើម្បីចូលរួមអភិវឌ្ឍវិស័យកសិកម្ម

នយោបាយ
/
អ្នកយកព័ត៌មាន:
ស៊ីស៊ីថាមស៍
/
 លោកបណ្ឌិត យ៉ង សាំង កុមារ

ភ្នំពេញ៖ លោកបណ្ឌិត យ៉ង សាំង កុមារ ថ្នាក់ដឹកនាំគណបក្សប្រជាធិបតេយ្យមូលដ្ឋានដែលជាអ្នកជំនាញផ្នែកវិស័យកសិកម្មល្បីល្បាយមួយរូបនៅកម្ពុជា បានប្រកាសចុះចូលជាមួយគណបក្សកាន់អំណាច និង ស្នើសុំបម្រើការងារជាមួយរាជរដ្ឋាភិបាល ដើម្បីមានឱកាសចូលរួម​អភិវឌ្ឍវិស័យកសិកម្មនៅកម្ពុជា។ប៉ុន្តែយ៉ាងណា ការស្នើសុំនេះនៅមិនទាន់បានការឆ្លើយតបពីសម្តេច ហ៊ុន សែន នៅឡើយទេ។

លិខិតស្នើសុំចូលរួមជីវភាពនយោបាយជាមួយគណបក្សប្រជាជនកម្ពុជារបស់លោកបណ្ឌិត យ៉ង សាំង កុមារ ត្រូវបានទម្លាយជាសាធារណៈ។ក្នុងលិខិតនោះលោកបណ្ឌិត យ៉ង សាំង កុមារ បានគូសបញ្ជាក់ថា លោកមានគោលនយោបាយលើកកម្ពស់ជីវភាពកសិករប្រកបដោយវិធានការជាក់ស្តែង ដូចជាគោលនយោបាយផលិតពូជស្រូវសម្រាប់លក់ចែកជូនប្រជាពលរដ្ឋក្នុងតម្លៃសមរម្យ គោលនយោបាយបាយកាត់បន្ថយថ្លៃដើមផលិត គោលនយោបាយបង្កើនទុនដល់ធានាគារអភិវឌ្ឍកសិកម្ម និង ជនបទ ព្រមទាំងគោលនយោបាយដោះស្រាយបញ្ហាទីផ្សារកសិផលជាដើម។

បើតាមអ្នកជំនាញរូបនេះ បានអះអាងថា លោកមានទំនុកចិត្តថា ការដាក់ចេញនូវគោលនយោបាយប្រាកដនិយមថ្មីនេះ គឺដូចគ្នាទៅនឹងចំណេះដឹង និងជំនាញ ឆន្ទៈ និងបទពិសោធន៍ការងារលើវិស័យកសិកម្មរបស់លោក។

លោកបណ្ឌិត យ៉ង សាំង កុមារ គឺជាអ្នកជំនាញកសិកម្មមួយរូប ដែលបានបញ្ចប់ការសិក្សាពីប្រទេសអាល្លឺម៉ង់។លោកតែងចូលរួមបញ្ចេញទស្សនៈនានាលើវិស័យកសិកម្ម ហើយលោកផ្ទាល់ក៏មានបង្កើតសមាគមចែករំលែកចំណេះជំនាញ និង អភិវឌ្ឍន៍លើវិស័យកសិកម្មនេះផងដែរ។

នៅរយៈពេលចុងក្រោយនេះ មានករណីផ្ទុះឡើងនូវវិបត្តិទីផ្សារកសិកម្ម ពិសេសស្រូវកសិករដែលលក់បានតម្លៃថោក ហើយលោកដាក់លិខិតជួបជាមួយរដ្ឋមន្ត្រីក្រសួងកសិកម្មថ្មី ​ដើម្បីជជែកពិភាក្សាអំពីយន្តការនៃការដោះស្រាយវិបត្តិកសិកម្ម ឬវិបត្តិទីផ្សារជូនកសិករ។ តែជាការឆ្លើយតប ​ការចូលរួមជាមួយរាជរដ្ឋាភិបាលដោះស្រាយបញ្ហានេះបាន គឺទាល់តែពួកលោកចូលរួមជីវភាពជាមួយគណបក្សកាន់អំណាចជាមុន។នេះបើយោងតាមប្រសាសន៍លោកបណ្ឌិត យ៉ង សាំង កុមារ ថ្លែងប្រាប់សារព័ត៌មានVOD។

លោកបណ្ឌិត យ៉ង សាំង កុមារ មានបំណងសុំជួបផ្ទាល់ជាមួយសម្តេច ហ៊ុន សែន ដើម្បីជជែកលម្អិតលើផែនការរបស់លោកដើម្បីទទួលបានការគាំទ្រពីសម្តេចជាមុនសិន៕

ផ្ទាំងពាណិជ្ជកម្ម
Img 4048
Photo 2023 06 28 13.36.05
Photo 2022 10 27 10.25.23
Khcct banner

អត្ថបទទាក់ទង