សភាកម្ពុជា និងវៀតណាមប្តេជ្ញារួមគ្នាជំរុញ«ទំនាក់ទំនង»កាន់តែរឹងមាំ

ហាណូយ៖ ប្រធានរដ្ឋសភាកម្ពុជា  និង នាយករដ្ឋមន្រ្តីវៀតណាម បានបេ្តជ្ញារួមគ្នាក្នុងការជំរុញកំណើនសេដ្ឋកិច្ច ពាណិជ្ជកម្មប្រទេសកម្ពុជា-វៀតណាមឲ្យកើនឡើង។ការប្តេជ្ញាចិត្តរួមគ្នានេះ ធ្វើឡើងក្នុងដំណើរទស្សនកិច្ចរបស់សម្តេច ហេង សំរិនប្រធានរដ្ឋសភាក្នុងប្រទេសវៀតណាម។

ក្នុងដំណើរទស្សនកិច្ចនោះ ប្រធានរដ្ឋសភាកម្ពុជា បានជួបជាមួយលោក ផាម ម៉ិញជិញ នាយករដ្ឋមន្រ្តីវៀតណាម និង បានប្តេជ្ញាចិត្តរួមគ្នានៅក្នុងការជំរុញទំនាក់ទំនងរវាងបក្ស រដ្ឋ និង ប្រជាជននៃប្រទេសទំាងពីរឲ្យកាន់តែរឹងមាំថែមទៀត ជាពិសេស រួមគ្នាក្នុងការអនុវត្តរាល់កិច្ចព្រមព្រៀមរវាងប្រទេសទំាងពីរដែលមានស្រាប់ ឲ្យកាន់តែមានប្រសិទ្ធភាព។ចំណែកចំនុចណាដែលពុំទាន់មានលទ្ធផលល្អ ភាគីទាំងពីរសន្យាថានឹងខិតខំធ្វើឲ្យប្រសើរឡើង។

នៅចំពោះមុខសម្តេច ហេង សំរិន លោក ផាម ម៉ិញជិញ បានវាយតម្លៃខ្ពស់ចំពោះដំណើរទស្សនកិច្ចរបស់សម្តេច និងថាវាបានជួយជំរុញចំណងមិត្តភាព កិច្ចសហប្រតិបត្តិការប្រទេសទំាងពីរកាន់តែរីកចម្រើនឡើង។ជាមួយគ្នានោះ លោកបានស្នើសម្តេច ហេង សំរិន បន្តគំាទ្រជំរុញដល់វិស័យពាណិជ្ជកម្ម និង សេដ្ឋកិច្ចប្រទេសទំាងពីរឲ្យកាន់តែមានកំណើនឡើងផងដែរ។

គួរបញ្ជាក់ថា នៅឆ្នាំ២០២១ ទំហំពាណិជ្ជកម្មប្រទេសកម្ពុជា និងវៀតណាម មានទំហំទឹកប្រាក់ប្រមាណ១០ពាន់លានដុល្លារ ហើយនៅក្នុងរយៈពេល៧ខែឆ្នាំ២០២២នេះ ទំហំពាណិជ្ជកម្មប្រទេសទំាងពីរសម្រេចបាន ៧ពាន់លានដុល្លារទៅហើយ។បច្ចុប្បន្ននេះ មានគម្រោងវិនិយោគរបស់ប្រទេសវៀតណាមចំនួន ១៨៨ កំពុងវិនិយោគនៅកម្ពុជា៕