ប្រមុខការទូតកម្ពុជា៖ ស្ថានភាពមនុស្សធម៌នៅមីយ៉ាន់ម៉ានឹងបន្តប្រសើរឡើង

ភ្នំពេញ៖ ឯកឧត្តម ប្រាក់ សុខុន ប្រមុខការទូតកម្ពុជា និងជាប្រេសិតពិសេសអាស៊ាន បានបង្ហាញពីឆន្ទៈក្នុងការខិតខំដោះស្រាយវិបត្តិនយោបាយនៅមីយ៉ាន់ម៉ា។ ក្នុងនាមកម្ពុជា ជាប្រធានអាស៊ាន កន្លងមកនេះ កម្ពុជាបានប្តេជ្ញាក្នុងការរិះរកគ្រប់មធ្យោបាយក្នុងការផ្តល់ជំនួយមនុស្សធម៌ដល់ពលរដ្ឋមីយ៉ាន់ម៉ាដែលត្រូវការជំនួយ។ តាមរយៈកាយវិការនេះ ឯកឧត្តម មើលឃើញថាស្ថានភាពមនុស្សធម៌នៅមីយ៉ាន់ម៉ានឹងបន្តប្រសើរឡើង។

ថ្លែងពីគន្លឹះពាក់ព័ន្ធនឹងកិច្ចខិតខំប្រឹងប្រែងរបស់អាស៊ានក្នុងការដោះស្រាយបញ្ហាមីយ៉ាន់ម៉ា (តាមប្រព័ន្ធវីដេអូ) ឯកឧត្តម ប្រាក់ សុខុន បានបង្ហាញពីឆន្ទៈរបស់សម្តេចនាយករដ្ឋមន្ត្រីក្នុងការបញ្ជូនបុគ្គលិកសុខាភិបាលស្ម័គ្រចិត្តរបស់កម្ពុជាទៅជួយគ្រប់គ្រងវ៉ាក់សាំងនៅប្រទេសមីយ៉ាន់ម៉ា។ កាយវិការនេះត្រូវបានស្វាគមន៍យ៉ាងខ្លាំងដោយក្រុមការងាររបស់មីយ៉ាន់ម៉ា។ ព័ត៌មានលម្អិតនៃគំនិតផ្តួចផ្តើមនេះនឹងត្រូវបានដោះស្រាយរវាងភាគីពាក់ព័ន្ធនានាក្នុងពេលសមស្រប។

បន្ថែមនេះ កម្ពុជាបានបរិច្ចាគថវិកាចំនួន 100,000 ដុល្លារអាមេរិក តាមរយៈមជ្ឈមណ្ឌល AHA និងបានបរិច្ចាគជាសាច់ប្រាក់ចំនួន 200,000 ដុល្លារ និងការផ្គត់ផ្គង់ផ្នែកវេជ្ជសាស្ត្រមួយចំនួនធំដោយផ្ទាល់ទៅកាន់ប្រទេសមីយ៉ាន់ម៉ា។ លើសពីនេះ កាកបាទក្រហមកម្ពុជា ក៏បានបរិច្ចាគថវិកាចំនួន ១០ម៉ឺនដុល្លារ ដល់សមាគមកាកបាទក្រហមមីយ៉ាន់ម៉ាផងដែរ។

ឯកឧត្តម ប្រាក់ សុខុន បញ្ជាក់ថា សរុបមក វឌ្ឍនភាពទាក់ទងនឹងការផ្តល់ជំនួយមនុស្សធម៌គឺពិតជាមានជោគជ័យ ហើយវាជាក្តីសង្ឃឹមរបស់យើងដែលថា ទោះបីជាត្រូវការពេលវេលាដើម្បីចាប់ផ្តើមការអនុវត្តកិច្ចព្រមព្រៀងដែលបានធ្វើឡើងនៅក្នុង PNP ក៏ដោយ ស្ថានភាពមនុស្សធម៌នៅក្នុងប្រទេសមីយ៉ាន់ម៉ានឹងបន្តប្រសើរឡើង។.

ឯកឧត្តម បន្តថា បន្ទាប់ពីជោគជ័យនៃការធ្វើជាម្ចាស់ផ្ទះនៃកិច្ចប្រជុំពិគ្រោះយោបល់ ដែលចាប់ផ្តើមការអនុវត្តក្របខ័ណ្ឌរដ្ឋបាលវ៉ាក់សាំងរួមគ្នារបស់ MoH-Partner Vaccines ដែលជាគំនិតផ្តួចផ្តើមរបស់កម្ពុជា ឯកឧត្តមបានទទួលក្នុងនាមអាស៊ាន វ៉ាក់សាំងការពារជំងឺកូវីដ-១៩ ចំនួន ២លានដូសពីចិន។ ក្នុងពិធីប្រគល់នេះ ឯកឧត្តមបានសង្កត់ធ្ងន់ថា "ជំនួយមនុស្សធម៌មិនគួរមានពណ៌សម្បុរ" ហើយភាគីទាំងអស់គួរតែទុកភាពខុសគ្នាខាងនយោបាយរបស់ពួកគេមួយឡែកសិន ដើម្បីយើងអាចផ្តល់ជំនួយមនុស្សធម៌នេះដល់ប្រជាជនដែលត្រូវការជំនួយបំផុត៕