Cc time
Cct850x100 1
Sme laon web banner(1800 x 300)

ករណីឆ្លងកូវីដ១៩នៅអាមេរិកកំពុងកើនឡើងខ្លាំង ដោយសារការធ្វើដំណើរដ៏មមាញឹក

អន្តរជាតិ
/
អ្នកយកព័ត៌មាន:
លី ម៉ាលីង
/
ករណីឆ្លងកូវីដ១៩នៅអាមេរិកកំពុងកើនឡើងខ្លាំង ដោយសារការធ្វើដំណើរដ៏មមាញឹក ប្រភពរូប ៖ ស៊ីស៊ីធីវី

អាមេរិក៖ មជ្ឈមណ្ឌលគ្រប់គ្រង និងបង្ការជំងឺ (CDC) បានរាយការណ៍កាលពីថ្ងៃអង្គារថា ស្ទើរតែគ្រប់ករណី COVID-19 ថ្មីរបស់សហរដ្ឋអាមេរិកកាលពីសប្តាហ៍មុន គឺជាករណីកូវីដ១៩បំលែងថ្មី អូមីក្រុង ដែលត្រូវបានគេស្គាល់ផងដែរថាជា B.1.1.529 ត្រូវបានរកឃើញប្រហែល ៩៥.៤ ភាគរយនៃករណីថ្មីទាំងអស់សម្រាប់សប្តាហ៍នៃថ្ងៃទី ២៦ ខែធ្នូដល់ថ្ងៃទី ១ ខែមករា។ ហើយប្រមាណ ៤.៦ ភាគរយ គឺកូវីដ១៩ ដែលតា ។

កាលពីថ្ងៃចន្ទ សហរដ្ឋអាមេរិកបានបំបែកកំណត់ត្រាមួយថ្ងៃជាមួយនឹងករណីឆ្លង COVID-19 ជាងមួយលានករណី ចំពេលមានការរីករាលដាលយ៉ាងឆាប់រហ័សនៃកូវីដ១៩បំលែងថ្មី អូមីក្រុង និងការសម្រេចចិត្តរបស់រដ្ឋាភិបាលក្នុងការបន្ធូរបន្ថយវិធានការបង្ការ និងគ្រប់គ្រងនៅក្នុងប្រទេស។

យោងតាមទិន្នន័យផ្លូវការបានឱ្យដឹងថា ជនជាតិអាមេរិកជាង ១០៣,០០០ នាក់ត្រូវបានសម្រាកព្យាបាលនៅមន្ទីរពេទ្យ កាលពីថ្ងៃចន្ទ ដែលជាចំនួនខ្ពស់បំផុតចាប់តាំងពីចុងរដូវក្តៅ នៅពេលដែលកូវីដ១៩បំលែងដែលតា បានបង្កឱ្យមានការកើនឡើងករណីឆ្លងទូទាំងប្រទេស។

ករណីថ្មីនៅសហរដ្ឋអាមេរិក ដែលត្រូវបានបញ្ជាក់ប្រចាំថ្ងៃ នៅតែមានកម្រិតខ្ពស់បំផុត ដោយសារការធ្វើដំណើរដ៏ញឹកញាប់ដែលធ្វើឡើងដោយជនជាតិអាមេរិកក្នុងអំឡុងពេលថ្ងៃឈប់សម្រាកចូលឆ្នាំសាកល ត្រូវបានចាត់ទុកថា ជាហេតុផលមួយដែលធ្វើឲ្យករណីឆ្លងកាន់តែការកើនឡើង។

ការរីករាលដាលយ៉ាងឆាប់រហ័សនៃកូវីដ១៩បំលែងថ្មី អូមីក្រុង ក៏បាននាំឱ្យមានការខ្វះខាតបុគ្គលិកក្រុមហ៊ុនអាកាសចរណ៍ផងដែរ។ គួបផ្សំនឹងអាកាសធាតុរដូវរងា បានបណ្តាលឱ្យមានការលុបចោលជើងហោះហើរជាច្រើនថ្ងៃ និងការពន្យារពេល។

គិតត្រឹមម៉ោង ១៥៖៣០ (EST) កាលពីថ្ងៃអង្គារ ជើងហោះហើរក្នុង និងក្រៅប្រទេសជាង ១,៤០០ ត្រូវបានលុបចោល ហើយជើងហោះហើរទាំងក្នុង និងក្រៅប្រទេសជាង ៣,៣០០ ត្រូវបានពន្យារពេល។ការលុបចោលជើងហោះហើរ និងការពន្យារពេលបានបន្តអស់រយៈពេលជាង ១០ ថ្ងៃ។

ចាប់តាំងពីថ្ងៃទី ២៤ ខែធ្នូ ឆ្នាំ ២០២១ ក្រុមហ៊ុនអាកាសចរណ៍អាមេរិកបានលុបចោលជើងហោះហើរជាង ១៩,០០០ នេះបើយោងតាមគេហទំព័រតាមដានការហោះហើរ។ អ្នកធ្វើដំណើរជាច្រើន បានចាកចេញពីព្រលានយន្តហោះ បន្ទាប់ពីផែនការធ្វើដំណើររបស់ពួកគេត្រូវបានរំខាន។

អ្នកជំនាញមួយចំនួនបាននិយាយថា ទោះបីជាមានការខ្វះខាតបុគ្គលិកនៅក្នុងក្រុមហ៊ុនអាកាសចរណ៍ក៏ដោយ ក៏នៅតែមានអ្នកទេសចរមួយចំនួនធំសម្រុកទៅព្រលានយន្តហោះ គួបផ្សំនឹងឥទ្ធិពលនៃអាកាសធាតុអាក្រក់ ធ្វើឱ្យការធ្វើដំណើរក្នុងឱកាសបុណ្យចូលឆ្នាំថ្មីរបស់សហរដ្ឋអាមេរិកមានភាពវឹកវរយ៉ាងខ្លាំង។

រហូតមកដល់ពេលនេះ សហរដ្ឋអាមេរិកនៅតែជាប្រទេសដែលរងគ្រោះខ្លាំងជាងគេដោយសារជំងឺរាតត្បាត ដែលមានអ្នកឆ្លង និងស្លាប់ច្រើនជាងគេលើពិភពលោក៕

Khcct banner

អត្ថបទទាក់ទង