ភ្នំពេញ៖ អាជ្ញាធរបានអំពាវនាវដល់ប្រជាពលរដ្ឋ ដែលជាអ្នកលក់ដូរនៅផ្សារអូរឬស្សីទាំងអស់គប្បីទៅធ្វើតេស្ដរកមេរោគកូវីដ១៩ នៅវិទ្យាល័យបាក់ទូក ក្រោយពីមានការរកឃើញអ្នកវិជ្ជមានកូវីដចំនួន០៦នាក់ មានប្រភពនៅក្នុងផ្សារនេះ។
អនុគណៈកម្មការស្រាវជ្រាវជំងឺកូវីដ១៩ បានអំពាវនាវទៅដល់ប្រជាពលរដ្ឋ ដែលជាអ្នកលក់ដូរនៅក្នុងផ្សារអូរឬស្សីទាំងអស់គួរតែទៅតេស្តរកកូវីដ១៩ ព្រោះកាលពីពេលកន្លងទៅមានអ្នកជំងឺកូវីដ១៩ ចំនួន០៦នាក់ជាអ្នកលក់ដូរនៅក្នុងផ្សារនេះ។
រដ្ឋបាលរាជធានីភ្នំពេញ បានឱ្យដឹងថា អ្នកទាំង០៦នាក់ដែលវិជ្ជមានកូវីដ១៩នោះ គឺជាក្រុមអាជីវករដែលជាអ្នកលក់ខោអាវ អ្នកលក់គ្រឿងទេស និងជាសន្តិសុខប្រចាំផ្សារ។
សូមជម្រាបជូនថា ផ្សារអូរឬស្សីបានផ្អាកដំណើរការរយៈពេល១៤ថ្ងៃ គឺដើម្បីបង្ការ និងទប់ស្កាត់ការឆ្លងរីករាលដាលមេរោគកូវីដ១៩ (COVID-19) ក្រោយមានអ្នកជំងឺកូវីដ១៩ សរុប ៦នាក់ មានប្រភពនៅក្នុងផ្សារអូរឫស្សីនេះ។
ទន្ទឹមនឹងនេះ ក្នុងពេលផ្អាកដំណើរការរដ្ឋបាលរាជធានីភ្នំពេញ ធានារ៉ាប់រងលើការងារ សន្តិសុខ និងសុវត្ថិភាព ចំពោះសម្ភារៈ និងឥវ៉ាន់គ្រប់ប្រភេទរបស់អាជីករមិនឱ្យមានការបាត់បង់ និងមិនតម្រូវឱ្យមានការបង់ថ្លៃសេវាទៅឱ្យភាគីពាក់ព័ន្ធណាមួយឡើយ។
