ព្រៃវែង៖ រដ្ឋាភិបាលកម្ពុជា បានសម្រេចដាក់តំបន់ទួលព័ន្ធតាឡី-បឹងស្នេហ៍ បង្កើតជាតំបន់ការពារធម្មជាតិ ដោយយោងតាអនុក្រឹត្យរបសរាជរដ្ឋាភិបាលកម្ពុជា កាលពីថ្ងៃទី០៥ ខែកុម្ភៈ ឆ្នាំ២០២១ កន្លងទៅ។
តំបន់ទេសចរណ៍បែបធម្មជាតិ ក្នុងភូមិកំពង់ស្នេហ៍ ឃុំធាយ ស្រុកបាភ្នំ ខេត្តព្រៃវែង ដែលស្គាល់ថា«ទួលព័ន្ធតាឡី-បឹងស្នេហ៍» ត្រូវបានរដ្ឋាភិបាលសម្រេចអនុញ្ញាតជាតំបន់ការពារធម្មជាតិ។
ក្រសួងបរិស្ថាន បានឱ្យដឹងថា ក្រសួងបានយកចិត្តទុកដាក់ខ្ពស់ក្នុងការធានាបាននូវប្រសិទ្ធភាព និងប្រសិទ្ធផល នៃការគ្រប់គ្រងធនធានធម្មជាតិ និងជីវៈចម្រុះ។
បន្ថែមពីនេះ ក្រសួងបានបង្កើតតំបន់ប្រើប្រាស់ច្រើនយ៉ាងទួលព័ន្ធតាឡី-បឹងស្នេហ៍ ដែលជាតំបន់មានសក្តានុពលខ្ពស់ទាំងផ្នែកសង្គម វប្បធម៌ និងការអភិរក្ស ជាតំបន់ការពារធម្មជាតិ។
សូមជម្រាបជូនថា តំបន់ប្រើប្រាស់ច្រើនយ៉ាងទួលព័ន្ធតាឡី-បឹងស្នេហ៍នេះ បានផ្តល់ជាសេវាកម្មប្រព័ន្ធអេកូឡូស៊ី និងធនធានធម្មជាតិយ៉ាងសម្បូរបែបដែលគាំទ្រដល់ការអភិវឌ្ឍសហគមន៍មូលដ្ឋានដូចជា៖ ជាបឹងមានទឹកជាអចិន្ត្រៃយ៍ទាំងនៅក្នុងរដូវប្រាំងនិងរដូវវស្សាដែលផ្តល់នូវ ប្រភពទឹកស្រោចស្រព្វដំណាំកសិកម្មរបស់ប្រជាពលរដ្ឋ និងសម្រាប់ប្រើប្រាស់ក្នុងជីវភាពប្រចាំថ្ងៃ។មានអន្លុងត្រីសំខាន់ៗដែលជាទីជម្រករស់នៅនិងបន្តពូជរបស់ត្រីជាច្រើនប្រភេទ និងជាកន្លែងនេសាទដ៏សំខាន់សម្រាប់ប្រជាជនរស់នៅជុំវិញតំបន់។
ជាងនេះទៅទៀត តំបន់នេះ ជាកន្លែងសម្រាកកំសាន្តនិងជាបឹងប្រវត្តិសាស្ត្រដែលផ្សាភ្ជាប់ជំនឿមានព្រលឹងអរូបិយ «អ្នកតាព័ន្ធតាឡី» និងបានទ្រទ្រង់ដល់វត្តមានសត្វស្លាបជាច្រើនប្រភេទរួមមានប្រភេទទទួលរងការគំរាមកំហែង និងជិតផុតពូជលើពិភពលោកដែលមានតម្លៃខ្ពស់សម្រាប់ការអភិរក្សជាអន្តរជាតិ។ ពិសេសទីនេះ ជាទីសំចតរបស់ប្រភេទសត្វស្លាបទេសសន្តរប្រវេសន៍មកស្នាក់នៅនិងរកចំណីបណ្តោះអាសន្ន ជាតំបន់ដែលមានជម្រកពងកូនសត្វស្លាបទឹកធំជាងគេទី២នៅប្រទេសកម្ពុជាបន្ទាប់ពីតំបន់រ៉ាមសារព្រែកទាល់៕
