ស្ថាប័ន២ រួមគ្នាសម្ដែងល្ខោនស្រមោលស្បែកធំអបអរខួបទី១៦ នៃការបញ្ចូលល្ខោនស្បែកធំជាបេតិកភណ្ឌវប្បធម៌អរូបីយូណេស្កូ

ភ្នំពេញ៖ ដើម្បីជាការអបអរសាទខួបលើកទី១៦ នៃការដាក់បញ្ជូលល្ខោនស្រមោលស្បែកធំចុះក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិរបស់អង្គការយូណេស្កូ សាលាមធ្យមវិចិត្រសិល្បៈ បានសហការជាមួយសមាគមសិល្បៈសុវណ្ណភូមិ នឹងសម្តែងល្ខោនស្រមោលស្បែកធំអន្លើ«នាងបុញ្ញកាយ» នៅរសៀលម៉ោង៦:៣០ថ្ងៃនេះ ក្នុងបរិវេណសាលាមធ្យមវិចិត្រសិល្បៈ(ជិតផ្សារទំនើបEAON2) ។

បើតាមសាលាមធ្យមសិក្សាវិចិត្រសិល្បៈ បានឱ្យដឹងថា ដើម្បីអបអរខួបលើកទី១៦ នៃការចុះបញ្ជូលល្ខោនស្រមោលស្បែកធំ ដែលជាសម្បត្តិវប្បធម៌អរូបីនៃមនុ្សជាតិក្នុងបញ្ជីបេតិកណ្ឌរបស់អង្គការយូណេស្កូ នៅរលៀលថ្ងៃនេះ វេលាម៉ោង៦:៣០នាទី នឹងមានការសម្ដែងល្ខោនស្រមោលស្បែកធំជូនសាធារណជនទស្សនាដោយសេរី នៅសាលាមធ្យមវិចិត្រសិល្បៈ។

បើតាមសាលារចនាបានឱ្យដឹងទៀតថា នេះជាការសម្ដែងលើកទី១ ហើយបន្ទាប់ពីបញ្ហាកូវីដ ដែលបានសហកាសំដែងដោយសមាគមសិល្បៈសុវណ្ណភូមិ។

សូមជម្រាបជូនថា ការដាក់បញ្ចូលល្ខោនស្រមោលស្បែកធំ ក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិរបស់អង្គការយូណេស្កូ គឺនៅថ្ងៃ ២៥ វិច្ឆិកា ២០០៥ មកទល់ថ្ងៃ ២៥ វិច្ឆិកា ២០២១នេះ គឺជាខួបលើកទី១៦ហើយ។

គួររំលឹកដែរថា សិល្បៈល្ខោនស្បែកធំ មានប្រវត្តិ និងអាយុកាលជាយូរលង់ណាស់មកហើយលើទឹកដី សុវណ្ណភូមិនៃកម្ពុរដ្ឋ ហើយត្រូវបានសកលលោកទទួលស្គាល់ និងឱ្យតម្លៃជាសម្បត្តិមនុស្សជាតិដ៏អស្ចារ្យ និងបានដាក់បញ្ចូលក្នុងបញ្ជីជាសម្បត្តិបេតិកភណ្ឌពិភពលោក ក្នុងឆ្នាំ២០០៥ របស់អង្គការយូណេស្កូ ដែលជាមោទនភាពជាតិមួយមិនអាចកាត់ថ្លៃបាន។

ទន្ទឹមនឹងនេះ ល្ខោនស្បែកធំ ជាសិល្បៈស្រមោលមួយបែប ដែលប្រើប្រាស់ផ្ទាំងរូបឆ្លាក់ពីស្បែក មកសម្តែងជាឈុតឆាកសាច់រឿង ហើយរូបឆ្លាក់ពីស្បែកទាំងនោះត្រូវគេដាប់ និងឆ្លាក់ជារូបអាទិទេព ដែលភាគច្រើនជារឿងបែបព្រហ្មណ៍សាសនា។ ល្ខោនស្បែកធំ គឺជាសិល្បៈមួយមានប្រវត្តិនៅពេលព្រហ្មសាសនាចូលមកទឹកដីខ្មែរ។ សិល្បៈប្រភេទនេះត្រូវបានគេឃើញ សម្តែងក្នុងពិធីតែពីរ ឬបីប៉ុណ្ណោះក្នុងមួយឆ្នាំ ហើយកម្រសម្តែងជាសាធារណៈណាស់ ដោយពិធីទាំងនេះរួមមានមានដូចជា ពិធីបុណ្យចូលឆ្នាំខ្មែរ ពិធីបុណ្យចម្រើនព្រះជន្មព្រះមហាក្សត្រ និងពិធីគ្រងរាជ្យ ឬក្នុងពិធីសក្ការៈរបស់ឥស្សរជនជាដើម។