ថៃ៖ រដ្ឋបាលក្រុងបាងកក បានប្រកាសបញ្ជីឈ្មោះសាលាចំនួន ៦៣ននឹងត្រូវបើកដំណើរការឡើងវិញនៅថ្ងៃស្អែកនេះ ដែលជាការចាប់ផ្តើមនៃឆមាសទីពីរក្នុងឆ្នាំសិក្សា២០២១។
បើតាមរដ្ឋបាលក្រុងបាងកកលោក Aswin Kwanmuang បានឱ្យដឹងថា សាលារៀនដែលនឹងបើកឡើងវិញត្រូវតែគោរពតាមវិធានការតំបន់សុវត្ថិភាព ឬ "Sandbox: Safety Zone in School" របស់ក្រសួងអប់រំ ដែលរួមមានការអនុវត្ត DMHT-RC និង SSET-CQ។
បើតាមលោករដ្ឋបាលក្រុងបានពន្យល់ថា ពាក្យ DMHT-RC សំដៅលើការឃ្លាតឆ្ងាយពីគ្នា ការពាក់ម៉ាស់ ការលាងដៃ ការធ្វើតេស្តរកកូវីដ កាត់បន្ថយការកកកុញ និងការសម្អាត។ ទន្ទឹមនឹងនេះ ការអនុវត្ត SSET-CQ រួមមានការថែទាំខ្លួនឯង ការប្រើស្លាបព្រា ញ៉ាំអាហារក្តៅ តាមដានចលនា ពិនិត្យខ្លួនឯង និងការដាក់ឱ្យនៅដាច់ពីគេ។
រដ្ឋបាលក្រុងរូបនេះបន្តទៀតថា ក្នុងករណីអ្នកជំងឺរកឃើញនៅក្នុងថ្នាក់រៀន រដ្ឋបាលក្រុងនឹងចេញបញ្ជាឱ្យបិទថ្នាក់រៀនរយៈពេលបីថ្ងៃសម្រាប់ការសម្អាត។ ហើយប្រសិនបើអ្នកជំងឺដែលបានបញ្ជាក់ត្រូវបានរកឃើញនៅក្នុងថ្នាក់ច្រើនជាងមួយ សាលាអាចពិចារណាបិទថ្នាក់ទាំងមូលសម្រាប់រយៈពេលបីថ្ងៃសម្រាប់ការសម្អាត។
បន្ថែមពីនេះ ប្រសិនបើសិស្ស គ្រូបង្រៀន ឬបុគ្គលិកសង្ស័យថាពួកគេអាចឆ្លងកូវីដ១៩ ពួកគេអាចស្នាក់នៅដាច់ដោយឡែកនៅផ្ទះរយៈពេល១៤ថ្ងៃដើម្បីតាមដានរោគសញ្ញារបស់ពួកគេ។ អ្នកដែលមានទំនាក់ទំនងជិតស្និទ្ធជាមួយអ្នកជំងឺដែលសង្ស័យអាចបន្តមកសាលារៀន។
សូមជម្រាបជូនថា គិតត្រឹមថ្ងៃសៅរ៍មានសិស្សចំនួន៣៤ ២៨៧ នាក់អាយុពី ១២-១៨ឆ្នាំ នៅទីក្រុងបាងកកបានដាក់ពាក្យចាក់វ៉ាក់សាំងកូវីដ១៩ ។ ក្នុងនោះសិស្សចំនួន ៣០.១៣៥ នាក់ជាសិស្សកម្រិតមធ្យមសិក្សា និង ៤.១៥២ នាក់ជាសិស្សកម្រិតវិទ្យាល័យ។ រហូតមកដល់ពេលនេះ សិស្សសាលាមធ្យមសិក្សាចំនួន២៧ ០៣៩ នាក់ និងសិស្សវិទ្យាល័យចំនួន៣ ៥០៣ នាក់ក្នុងទីក្រុងបាងកក បានចាក់វ៉ាក់សាំងលើកដំបូងរបស់ពួកគេ។
