ថៃ៖ រដ្ឋបាលក្រុងបាងកកបានស្នើសុំឱ្យប៉ូលីសដាក់កម្រិតល្បឿន ៥០ គីឡូម៉ែត្រក្នុងមួយម៉ោង នៅលើផ្លូវចំនួន ៤០ ក្នុងទីក្រុងបាងកក និងជុំវិញតំបន់លំនៅដ្ឋានសំខាន់ៗដែលមានប្រជាពលរដ្ឋធ្វើដំណើរចេញចូលច្រើន។លោក Thaiphat Tanasombatkul អគ្គនាយកនៃនាយកដ្ឋានចរាចរណ៍ និងដឹកជញ្ជូនរបស់ថៃបានឲ្យដឹងថាសំណើនេះនឹងត្រូវដាក់នៅការិយាល័យប៉ូលីស Metropolitan (MPB) ដើម្បីកាត់បន្ថយគ្រោះថ្នាក់ចរាចរណ៍ និងលើកកម្ពស់សុវត្ថិភាពចរាចរណ៍ក្នុងប្រទេស។
រដ្ឋបាលក្រុងបាងកក បានដាក់ចេញនូវគោលនយោបាយ និងវិធានការនានា ដើម្បីបង្កើនសុវត្ថិភាពចរាចរណ៍ ណែនាំអំពីការកំណត់ល្បឿនសម្រាប់ផ្លូវដែលមានមនុស្សម្នាឆ្លងកាត់ច្រើន និងតំបន់លំនៅដ្ឋានដែលមានការមមាញឹក។ ការវាយតម្លៃបានរកឃើញថាល្បឿនអតិបរមាស្តង់ដារ ៨០ គីឡូម៉ែត្រក្នុងមួយម៉ោងក្នុងទីក្រុងគឺលឿនពេក ហើយដូច្នេះវាមិនមានសុវត្ថិភាពសម្រាប់អ្នកបើកបរ អ្នកជិះកង់ អ្នកជិះម៉ូតូ និងអ្នកថ្មើរជើងឡើយ ហើយនៅពេលដែលការកំណត់ថ្មីត្រូវបានដាក់ឱ្យដំណើរការជាផ្លូវការ នាយកដ្ឋាននឹងដំឡើងផ្លាកសញ្ញាព្រមានអ្នកបើកបរអំពីការដាក់កម្រិតថ្មីនៃល្បឿនបើកបរ៕
