ថៃ៖ តាមរយៈការស្ទង់មតិនាពេលថ្មីៗនេះបង្ហាញថា ប្រជាជនថៃជាង ៧០ ភាគរយមានការព្រួយបារម្ភថាការបើកដំណើរការប្រទេសឡើងវិញនៅថ្ងៃទី១ ខែវិច្ឆិកា នឹងបង្កឱ្យមានរលកថ្មីនៃការឆ្លងមេរោគកូវី១៩ ជាពិសេសប្រសិនបើហាងស្រា បារ និងកន្លែងកម្សាន្តត្រូវបានបើកឡើងវិញចាប់ពីថ្ងៃទី១ ខែធ្នូ។
បើតាមការចុះផ្សាយរបស់កាសែតក្នុងស្រុកថៃ បានឱ្យដឹងថា ទោះយ៉ាងណាក៏ដោយ ជាងពាក់កណ្តាលនៃអ្នកឆ្លើយសំណួរបាននិយាយថា ពួកគេសង្ឃឹមថាការបើកដំណើរការប្រទេសឡើងវិញនឹងធ្វើឱ្យសេដ្ឋកិច្ចរបស់ប្រទេសថៃថើបឡើងវិញ។ ការស្ទង់មតិនេះ ត្រូវបានធ្វើឡើងដោយសាកលវិទ្យាល័យបាងកកពីអ្នកឆ្លើយសំណួរចំនួន១ ១៧៣ មកពីទូទាំងប្រទេស។
តាមប្រភពដដែលបន្តថា ការស្ទង់មតិបានបង្ហាញថាអ្នកចូលរួម ៤៦.៣ ភាគរយជឿថាស្ថានភាពទូទៅរបស់ប្រទេសថៃនឹងប្រសើរឡើងបន្ទាប់ពីការបើកឡើងវិញ ហើយចំនួន២៧.៥ ភាគរយទៀតជឿថាស្ថានភាពនឹងកាន់តែអាក្រក់ ក្នុងនោះមាន២៦.២ ភាគរយបាននិយាយថាគ្មានអ្វីនឹងផ្លាស់ប្តូរទេ។
ការស្ទង់មតិក៏បានសិក្សាផងដែរថាចំនួន៥១.១ភាគរយសង្ឃឹមថាសេដ្ឋកិច្ចរបស់ប្រទេសថៃនឹងប្រសើរឡើងនៅពេលដែលវាត្រូវបានបើកឡើងវិញ ខណៈដែល ៤៣.៤ ភាគរយសង្ឃឹមថាការបើកឡើងវិញនឹងជួយភោជនីយដ្ឋាន និងហាងលក់រាយ និង ៤២.៧ភាគរយសង្ឃឹមថាការបើកឡើងវិញនឹងបង្កើតការងារកាន់តែច្រើន និងបង្កើនប្រាក់ចំណូលរបស់ប្រជាជន។
ទោះជាយ៉ាងណាក៏ដោយលក្នុងចំណោមការឆ្លើយសំណួរមាន៧២ ភាគរយបាននិយាយថាពួកគេមានការព្រួយបារម្ភយ៉ាងខ្លាំង ដែលថាការបើកដំណើរការឡើងវិញរបស់ប្រទេសថៃនៅថ្ងៃច័ន្ទនឹងបង្កឱ្យមានការឆ្លងថ្មី ខណៈដែល ២៨ ភាគរយមានការព្រួយបារម្ភតិចតួចប៉ុណ្ណោះ។
