ត្បូងឃ្មុំ៉៖ ព្រះសង្ឃ ១១អង្គ ដែលគង់នៅវត្តទួលទ្រាត្បូង ឃុំជប់ ស្រុកត្បូងឃ្មុំ នៅយប់ថ្ងៃទី ២៤ ខែមិថុនា ឆ្នាំ ២០២១ ត្រូវបានអាជ្ញាធរចុះយកសំណាករកឃើញវិជ្ជមានកូវីដ១៩។ នេះបើយោងតាមការចុះផ្សាយរបស់អភិបាលនៃគណៈអភិបាលខេត្តត្បូងឃ្មុំ។
ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តត្បូងឃ្មុំ និងលោកជំទាវ ម៉េង វ៉ាន់ដានីន ដឹកនាំក្រុមការងារចុះទៅពិនិត្យផ្ទាល់ភ្លាមៗ ក្រោយទទួលដំណឹងព្រះសង្ឃចំនួន ១១អង្គ រកឃើញវិជ្ជមានកូវីដ១៩ នៅវត្តទួលទ្រាត្បូង ឃុំជប់ ស្រុកត្បូងឃ្មុំ ខេត្តត្បុងឃ្មុំ។
យោងតាមរដ្ឋបាលខេត្តត្បូងឃ្មុំ បានបញ្ជាក់ថា នៅព្រឹកថ្ងៃទី២៥ ខែមិថុនា ២០២១នេះ បានបន្តតេស្តឃើញវិជ្ជមានកើនឡើងជាបន្តបន្ទាប់បន្ថែមទៀត ឯកឧត្តមបណ្ឌិត បានដឹកនាំក្រុមការងារ បន្តចុះទៅសួរសុខទុក្ខ នាំយកគ្រឿងឧបភោគ បរិភោគ និងសម្ភារៈប្រើប្រាស់ ទៅប្រគេនព្រះសង្ឃកំពុងអាពាធ ដោយជំងឺកូវីដ១៩ និងព្រះសង្ឃទាំងអស់សរុប ប្រមាណ១៥០អង្គ ដែលកំពុងធ្វើចត្តាឡីស័កតាមដានសុខភាពនៅ«វត្តទួលទ្រាត្បូង»នោះផងដែរ។
ជាមួយករណីនេះ ក្រុមការងារចុះទៅពិនិត្យផ្ទាល់ភ្លាមៗ បាន និងកំពុងបន្តស្រាវជ្រាវរកអ្នកពាក់ព័ន្ធដែលគង់ក្នុងវត្ត និងមានទំនាក់ទំនងដោយផ្ទាល់ និងដោយប្រយោលទាំងអស់ ដើម្បីចៀសវាងក្នុងការឆ្លងរីករាលដាលជំងឺជាសហគមន៍បន្តទៀត។
គួរបញ្ជាក់ថា ក្នុងករណីខាងលើនេះ ក៏មានពាក់ព័ន្ធនឹងប្រជាពលរដ្ឋចំនួន ០៧នាក់ផងដែរ ក្នុងស្រុកពញាក្រែក ដែលរស់នៅក្នុងភូមិក្រញូង ឃុំវាលម្លូរ ប៉ុន្តែក្រោយធ្វើតេស្តក្រោមការដឹកនាំរបស់លោក លី សុភាលីន អភិបាលស្រុកពញាក្រែក ពួកគាត់ទាំង ០៧ នាក់ ទទួលលទ្ធផលអវិជ្ជមានទាំងអស់ ។
