អ្នកពាក់ព័ន្ធនឹងទីតាំង«អេង វី គ្រឿងបន្លាស់រថយន្ត»(ជិតផ្សារដេប៉ូ)សូមតាមដានសុខភាពរបស់ខ្លួន

ភ្នំពេញ៖ យោងតាមការប្រកាសរបស់អនុគណៈកម្មការស្រាវជ្រាវជំងឺកូវីដ-១៩ នៅថ្ងៃទី០៦ ខែមិថុនា នេះ បានជូនដំណឹងថា អ្នកជំងឺកូវីដ១៩​​ តែងតែទៅទិញគ្រឿងបន្លាស់រថយន្តស្ទើរតែរាល់ថ្ងៃ នៅទីតាំង«អេង វី គ្រឿងបន្លាស់រថយន្ត»(ជិតផ្សារដេប៉ូ) ដែលមានទីតាំងស្ថិតនៅផ្ទះលេខ១៨២B ផ្លូវ១៨២ សង្កាត់វាល់វង់ ខណ្ឌ៧មករា​ រាជធានីភ្នំពេញ។ ហេតុនេះ អ្នកដែលពាក់ព័ន្ធនឹងករណីនេះ ចាប់ពីថ្ងៃទី២៩ ខែឧសភា ដល់ថ្ងៃទី០៤ ខែមិថុនា ឆ្នាំ២០២១ សូមដាក់ខ្លួនដាច់ដោយឡែក និង«តាមដានសុខភាព» រយៈពេល ១៤ថ្ងៃ ហើយបើមានរោគសញ្ញាគួរសង្ស័យ សូមមេត្តាប្រញាប់ទៅយកសំណាកធ្វើតេស្តរកកូវីដនៅមន្ទីរពេទ្យ។

ជាមួយនឹងករណីនេះ អ្នកប៉ះពាល់នៅទីតាំងខាងលើនេះ មិនទាន់បានទៅយកសំណាកនៅឡើយទេ គិតត្រឹមព្រឹកថ្ងៃទី០៨ ខែមិថុនា មកម្ល៉េះ ហើយអាជ្ញាធរ បានអំពាវនាវដល់ប្រជាពលរដ្ឋពាក់ព័ន្ធ ទៅយកសំណាក ហើយធ្វើចត្តាឡីស័កតាមដានសុខភាព និងសូមក្រើនរំលឹកប្រជាពលរដ្ឋ​ ជាពិសេសជាងជួសជុលរថយន្ត ដែលបានទៅ «អេង វី គ្រឿងបន្លាស់រថយន្ត»(ជិតផ្សារដេប៉ូ) ចាប់ពីថ្ងៃទី២៩ ខែឧសភា ដល់ថ្ងៃទី០៤ ខែមិថុនា ឆ្នាំ២០២១ សូមដាក់ខ្លួនដាច់ដោយឡែក និងយកចិត្តទុកដាក់«តាមដានសុខភាព»របស់ខ្លួនរយៈពេល ១៤ ថ្ងៃ។ 

ក្នុងករណីមានរោគសញ្ញា នៃសុខភាពប្រែប្រួលផ្សេងៗ ដូចជា គ្រុនក្ដៅ ក្អក កណ្ដាស់ ឈឺបំពង់ក ឬដកដង្ហើមខ្លីៗ ឬសង្ស័យ សូមមេត្តាប្រញាប់ទៅធ្វេីតេស្តរកមេរោគ និងសូមអញ្ជើញទៅតេស្តកូវីដនៅមន្ទីរពេទ្យដែលនៅជិតបំផុតដូចជា នៅវិទ្យាល័យបាក់ទូក ឬវិទ្យាល័យបឹងត្របែក ឬមណ្ឌលសុខភាពចាក់អង្រែក្រោម ឬមន្ទីរពេទ្យខ្មែរសូវៀត សាលាបឋមសិក្សា«សុភមង្គល» (ក្រោយផ្សារស៊ិន ជូរី បណ្តោះអាសន្ន), វិហារព្រះយ៉េស៊ូ ច្រមុះជ្រូកស្ទឹងមានជ័យ, ផ្លូវ ឌួងងៀប ជិតរោងចក្រ ឌីនហាន, ដីឡូត៍ ខាងក្រោយផ្សារឯករាជ្យ៣, មណ្ឌលថែទាំជីវិត (ទីតាំងចាក់សំរាមចាស់ ស្ទឹងមានជ័យ) និងមន្ទីរពេទ្យបង្អែកនៅតាមបណ្តាខេត្តនានា ឱ្យបានលឿនតាមដែលអាចធ្វើបាន ហើយសម្រាប់ពត៌មា​នបន្ថែម សូមទាក់ទងលេខ ១១៥។

គួររំលឹកថា អ្នកដែលស្ម័គ្រចិត្តទៅធ្វើតេស្ត សូមកុំភ្លេច​ភ្ជាប់អត្តសញ្ញាណបណ្ឌផ្ទាល់ខ្លួនទៅជាមួយផង និងពាក់ម៉ាសជាប្រចាំ បន្ទាប់ពីអញ្ជើញទៅធ្វើតេស្តសុខភាពរួចរាល់ហើយ សូមបន្តធ្វើការផ្ដាច់ខ្លួនឱ្យនៅដាច់ដោយឡែករយៈពេល ១៤ថ្ងៃបន្តទៀត ដើម្បីទប់ស្កាត់ការរីករាលនៃជំងឺកូវីដ១៩ ដើម្បីខ្លួនឯង គ្រួសារ និងសង្គមជាតិទាំងមូល៕