ភ្នំពេញ៖ ក្រសួងសុខាភិបាលកម្ពុជា នៅថ្ងៃទី១៥ ខែមេសា ឆ្នាំ២០២១នេះ បានចេញសេចក្តីប្រកាសព័ត៌មានពីការរកឃើញអ្នកឆ្លងជំងឺកូវីដ-១៩ ថ្មីចំនួន ៣៤៤នាក់បន្ថែមទៀត ក្នុងនោះមាន ៣៣៩នាក់ ដែលជាប់ពាក់ព័ន្ធនឹង«ព្រឹត្តិការណ៍សហគមន៍២០កុម្ភៈ» និងជាសះស្បើយចំនួន ២៩នាក់ផងដែរ។
ក្នុងចំណោមអ្នកឆ្លងកូវីដថ្មីទាំង ៣៤៤នាក់ខាងលើ ម្នាក់ជាពលករខ្មែរមកពីប្រទេសថៃ, ០៤នាក់ជាជនជាតិឥណ្ឌូនេស៊ីធ្វើដំណើរចូលមកកម្ពុជា និងអ្នកជំងឺ ៣៣៩នាក់ទៀត ជាករណីឆ្លងនៃព្រឹត្តិការណ៍សហគមន៍២០កុម្ភៈនៅរាជធានីភ្នំពេញមានអ្នកឆ្លងកូវីដចំនួនច្រើនជាងគេ មានចំនួនអ្នកឆ្លងរហូតទៅដល់ ២៤៣នាក់ ហើយខេត្តស្វាយរៀង ៧១នាក់, ខេត្តព្រះសីហនុ ០៦នាក់ , ខេត្តសៀមរាប ០១នាក់ , ខេត្តកណ្ដាល ០៨នាក់ , ខេត្តកោះកុង ០៥នាក់, ខេត្តក្រចេះ ០២នាក់ និងខេត្តតាកែវ ០៣នាក់។
គួរបញ្ជាក់ថា គិតត្រឹមព្រឹកថ្ងៃទី១៥ ខែមេសា ឆ្នាំ២០២១នេះ កម្ពុជាបានរកឃើញអ្នកឆ្លងជំងឺកូវីដសរុបចំនួន ៥២១៨នាក់ ជាសះស្បើយចំនួន ២៣១៩នាក់ និងអ្នកកំពុងសម្រាកព្យាបាលនៅមន្ទីរពេទ្យចំនួន ២៨៥៨នាក់ ហើយករណីស្លាប់ ៣៦នាក់៕
