ភ្នំពេញ៖ រដ្ឋាភិបាលកម្ពុជាគាទ្រយ៉ាងពេញទំហឹង ចំពោះការស្នើសុំចូលរបស់ប្រទេសទីម័រឡេស្តេ ក្នុងការចូលជាសមាជិកពេញសិទ្ធរបស់អាស៊ាន។ នេះបើតាមការបញ្ជាក់របស់សម្ដេចតេជោ ហ៊ុន សែន ក្នុងថ្ងៃ២៦ មិថុនា ឆ្នាំ២០២០។
ថ្លែងក្នុងកិច្ចប្រជុំកំពូលអាស៊ានលើកទី៣៦ តាមរយៈប្រព័ន្ធវីដេអូ ក្រោមប្រធានបទ«ភាពស្អិតរមួត និង ការឆ្លើយតប» សម្ដេច ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានគាំទ្រយ៉ាងពេញទំហឹង និងទន្ទឹងរង់ចាំការដាក់បញ្ចូលទីម័រឡេស្តេ ជាសមាជិកពេញសិទ្ធរបស់អាស៊ាន។
សម្ដេចមានប្រសាសន៍យ៉ាងដូច្នេះថា៖« ខ្ញុំមានសុទិដ្ឋិនិយនថា សមាជិកភាពរបស់ទីម័រឡេស្តេ មិនត្រឹមតែមានសារៈសំខាន់ជាយុទ្ធសាស្រ្តសម្រាប់កម្ពុជា ក្នុងបរិបទនៃការប្រកួតប្រជែងភូមិសាស្រ្តនយោបាយរវាងប្រទេសមហាអំណាចប៉ុណ្ណោះទេ ប៉ុន្តែ ថែមទាំងសម្រាប់ការសម្រេចក្ដីសុបិនរបស់បិតាស្ថាបនិកអាស៊ាន ក្នុងការបង្រួបបង្រួមប្រទេសទាំងអស់ក្នុងតំបន់អាស៊ីអាគ្នេយ៍ ក្រោមឆ័ត្រអាស៊ានផងដែរ»។
សម្ដេចបានគូសបញ្ជាក់ថា ក្នុងស្មារតីនេះ គ្រប់គ្នាគួរបន្តធ្វើការយ៉ាងជិតស្និតជាមួយរដ្ឋាភិបាលទីម័រឡេស្តេ ដើម្បីដោះស្រាយបញ្ហាធំៗ ដែលប្រទេសនេះកំពុងជួបប្រទះ ដោយសំដៅដល់ការជួយបំពេញរាល់នីតិវិធី និង លក្ខខណ្ឌតម្រូវចាំបាច់នានា ឱ្យបានឆាប់ផងដែរ៕
