ភ្នំពេញ៖ ប្រជាពលរដ្ឋនៅខេត្តតាកែវ ដែលបានប៉ះពាល់ដោយផ្ទាល់ និងប្រយោលជាមួយបុគ្គលកក្កដា សោភ័ណ្ឌ នៅក្នុងពិធីមង្គលការមួយកាលពីថ្ងៃ១២មីនា បានសម្រុកមកធ្វើតេស្តផ្ដល់សំណាកយ៉ាងច្រើនកុះករតាមការអំពាវនាវរបស់អាជ្ញាធរ។
នៅព្រឹកនេះ មន្ទីរសុខាភិបាលខេត្តតាកែវ ដោយរួមកិច្ចសហការជាមួយការិយាល័យសុខាភិបាលស្រុកប្រតិបត្តិចំនួន៣ស្រុក និងក្រុងមួយ រួមមាន ការិយាល័យសុខាភិបាលស្រុកប្រតិបត្តិបាទី ព្រៃកប្បាស និងស្រុកប្រតិបត្តិក្រុងដូនកែវ បានចុះមកយកសំណាកពីប្រជាពលរដ្ឋដែលបានប៉ះផ្ទាល់ និងប្រយោល ជាមួយព្រឹត្តិការ១២ មីនា។
ក្នុងដំណើការចុះយកសំណាកនេះ មានកងទ័ពអាវសចូលរួមប្រមាណ៦០នាក់ ដើម្បីបើកយុទ្ធនាការប្រមូលវត្ថុសំណាកពីប្រជាពលរដ្ឋជាប់ពាក់ព័ន្ធដោយផ្ទាល់ និងដោយប្រយោល ដែលនៅសេសសល់ក្នុងព្រឹត្តិការណ៍១២មីនា ហើយសង្ស័យថាបានពាក់ព័ន្ធនិងបុគ្គលផ្ទុកកូវីដ១៩ កក្កដា សុភ័ណ្ឌ ក្នុងពីធីមង្គលការមួយកន្លែងនៅភូមិក្រាំងលាវ ឃុំរវៀង ស្រុកសំរោង ខេត្តតាកែវ កាលពីថ្ងៃទី១១ និងទី១២ ខែមីនា ឆ្នាំ២០២១កន្លងមកនេះ ។
បើតាមអាជ្ញាធរមូលដ្ឋានបានឱ្យដឹងថា នៅក្នុងទិដ្ឋភាពនេះគឺសង្កេតឃើញប្រជាពលរដ្ឋដែលជាប់ពាក់ព័ន្ឌនឹងព្រឹត្តិការណ៍ខាងលើបានភ្ញាក់រឭកនាំគ្នាអញ្ជើញមកផ្តល់វត្ថុសំណាកយ៉ាងច្រើនកុះករតាមការអំពាវនាវដោយទទូចរបស់អាជ្ញាធរគ្រប់លំបាប់ថ្នាក់។
សូមជម្រាបជូនថា គិតត្រឹមថ្ងៃទី៣០ ខែមីនា ឆ្នាំ២០២១នេះ កម្ពុជាបានរកឃើញអ្នកឆ្លងជំងឺកូវីដសរុបចំនួន ២៣៧៧នាក់ ជាសះស្បើយចំនួន ១១៧៦នាក់ និងអ្នកកំពុងសម្រាកព្យាបាលនៅមន្ទីរពេទ្យចំនួន ១១៨៦នាក់ ហើយករណីស្លាប់ ១១នាក់៕
