ភ្នំពេញ៖ រដ្ឋបាលខេត្តកំពង់ចាម ចុះផ្អាកអាជីវកម្មសិប្បកម្មឡឥដ្ឋមួយកន្លែង នៅភូមិអូរកណ្តា ឃុំព្រែកក្របៅ ស្រុកកងមាស ខេត្តកំពង់ចាម បន្ទាប់ពីរកឃើញបុរសម្នាក់មានវិជ្ជមានកូវីដ-១៩ ចូលទៅស្នាក់នៅជាមួយក្រុមគ្រួសារក្នុងសិប្បកម្មនោះ។
រដ្ឋបាលខេត្តកំពង់ចាម បានចេញលិខិតផ្អាកដំណើរការនៃសិប្បកម្មឡឥដ្ឋក្នុងស្រុងកងមាស ខេត្តកំពង់ចាម បន្ទាប់ពីមានការស្រាវជ្រាវរកឃើញថាមានបុរសម្នាក់វិជ្ជមានកូវីដ១៩ ឈ្មោះ មុី ស៊ីថាន បានមកស្នាក់នៅផ្ទះកម្មករ នៅក្នុងសិប្បកម្មខាងលើ និងបានជួបជុំសមាជិកគ្រួសារដែលកំពុងស្នាកនៅសិប្បកម្មនេះ។
យោងតាមវិធានការរបស់់ក្រសួងសុខាភិបាល ក្នុងការទប់ស្កាត់ការរីករាលដាល់ គឺរដ្ឋបាលខេត្តសម្រេចចុះបិទទីតាំងផលិតឥដ្ឋនេះបណ្ដោះអាសន្ន ដើម្បជាការងាយស្រួងក្នុងការទប់ស្កាត់ និងធ្វើការទៅតាមមុខសញ្ញាពាក់ព័ន្ធ ដើម្បីយកមកធ្វើចត្តាឡីស័ក។
ដោយឡែក ចំពោះកម្មករដែលប៉ះពាល់ដោយប្រយោល គឺត្រូវធ្វើចត្តាឡីស័ករយៈពេល១៤ថ្ងៃនៅតាមផ្ទះ ដើម្បីបន្តតាមដានសុខភាព និងយកសំណាកមកពិនិត្យ។
សូមជម្រាបជូនថា គិតត្រឹមព្រឹកថ្ងៃទី១១ ខែមីនា ឆ្នាំ២០២១នេះ កម្ពុជាបានរកឃើញអ្នកឆ្លងជំងឺកូវីដសរុបចំនួន ១១៦៣នាក់ ក្នុងនោះអ្នកជាសះស្បើយចំនួន ៥៩៧នាក់ និងអ្នកកំពុងសម្រាកព្យាបាលនៅមន្ទីរពេទ្យចំនួន ៥៦៥នាក់៕
