ភ្នំពេញ៖ ក្រសួងប្រៃសណីយ៍នឹងទូរគមនាគមន៍ (គ.ប.ទ.) នៅថ្ងៃទី ១៧ កុម្ភៈ បានចេញសេចក្ដីជូនដំណឹងស្ដីពីការដាក់អោយដំណើរការកម្មវិធីវាស់ស្ទង់ល្បឿនអ៉ីនធឺណេត (MPTC Speed Test)។ កម្មវិធីនេះធ្វើឡើងដើម្បី ការពារសិទ្ធនិងផលប្រយោជន៍របស់អ្នកប្រើប្រាស់ ក្នុងការទទួលបានសេវាទូរគមនាគមន៍ប្រកបដោយគុណភាព និងលើកម្ពស់តម្លាភាពនៃការផ្ដល់ទិន្នន័យ។
យោងតាមសេចក្តីជូនដំណឹង បានឱ្យដឹងថា កម្មវិធី MPTC Speed Test មានមុខងារវាស់ស្ទង់ដំណើរការអ៉ីនធឺណេតនៅគ្រប់ទីកន្លែង និងគ្រប់ពេលវេលា ដោយបង្ហាញលទ្ធផលច្បាស់លាស់អំពីល្បឿនទាញយក ល្បឿនបង្ហោះឡើង ភាពយឺតយ៉ាវ ការរំខាន និងកម្រិតគុណភាពនៃការមើលវីដេអូតាមយូធូប ដែលជាព័ត៌មានចាំបាច់សម្រប់ការប្រើប្រាស់អ៉ីនធឺណេតប្រចាំថ្ងៃ។
បើតាមក្រសួងប្រៃសណីយ៍ ក្នុងករណីវាស់ស្តង់នេះបង្ហាញលទ្ធផលថា គុណភាពសេវាអ៉ីនធឺណេត មានភាពមិនប្រក្រតី ឬស្ថិតក្នុងកម្រិតមួយមិនអាចប្រើប្រាស់បាន អ្នកប្រើប្រាស់អាចយកលទ្ធផលនោះជាភស្ដុតាងសម្រាប់រាយការណ៍មកនិយតករទូរគមនាគមន៍កម្ពុជា តាមរយៈទូសស័ព្ទ Hotline ៦៧៨៩ ឬផ្ញើសារមកកាន់អ៉ីមែល [email protected] ដើម្បីប្ដឹងតវ៉ា និង ស្វែងរកដំណោះស្រាយ។
លទ្ធផលនៃការវាស់ស្ទង់របស់អ្នកប្រើប្រាស់នឹងក្លាយជាទិន្នន័យចាំបាច់ សម្រាប់យកទៅវិភាគ និងរកដំណោះស្រាយ លើការពង្រឹងគុណភាពសេវាទូរគមនាគមន៍ឱ្យកាន់តែប្រសើរ។នេះបើតាមក្រសួងប្រៃសណីយ៍៕
![](https://cdn.cc-times.com/kh.cc-times.com/media/19339/large/photo_2022-02-18_10-49-24_(2).jpg?1645159777)