រូបភាព៖ ក្រសួងមហាផ្ទៃ
ភ្នំពេញ៖ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានចេញសារអំពាវនាវដល់ពលករខ្មែរ ដែលកំពុងស្នាក់នៅ និងធ្វើការនៅប្រទេសថៃ គួរកុំចល័តទីតាំងចុះឡើង។ការអំពាវនាវនេះ ធ្វើឡើងខណៈពេលដែលមេរោគថ្មីដែលតាកំពុងចរាចរខ្លាំងរហូតមានការបិទខ្ទប់ខេត្តនៅតាមព្រំដែនរវាងប្រទេសកម្ពុជា និងប្រទេសថៃ។
ប្រឈមនឹងបញ្ហានេះ លោក ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានអំពាវនាវដល់ពលករខ្មែរទាំងអស់ ដែលកំពុងតែស្នាក់នៅ និងធ្វើការនៅប្រទេសថៃ គួរកុំចល័តចេញពីកន្លែងដែលខ្លួនកំពុងរស់នៅឆ្ពោះមកព្រំដែនកម្ពុជា-ថៃ ចាប់ពីម៉ោងនេះតទៅ។
លោកបន្តថា បើទោះបីជាបងប្អូន មានធរុៈចាំបាច់ ឬចប់ការងារត្រូវវិលត្រឡប់មកវិញ ក៏ត្រូវពន្យារពេលយ៉ាងហោចណាស់ដល់ថ្ងៃទី១៣ ខែសីហា ឆ្នាំ២០២១នេះ។
បើតាមក្រសួងការងារ ប្រសិនជាប្រជាពលរដ្ឋធ្វើដំណើរមកព្រំដែនកម្ពុជា-ថៃ តាមមធ្យោបាយណាក៏ដោយ គឺបងប្អូននឹងត្រូវអាជ្ញាធរមានសមត្ថកិច្ចថៃតម្រូវឱ្យធ្វើដំណើរវិលត្រឡប់ទៅកន្លែងដើមវិញ។ហើយម្ចាស់រថយន្ត ឬមេខ្យល់ ដែលដឹកជញ្ជូនពលករ គឺល្មើសនឹងបម្រាមរបស់អាជ្ញាធរថៃ ដូច្នេះត្រូវប្រឈមនឹងការចាត់វិធានការច្បាប់ផងដែរ។
សូមជម្រាបថា ចាប់ពីខែមករា ដល់ខែមិថុនា ឆ្នាំ២០២១នេះ ពលករខ្មែរបានវិលត្រឡប់ជារៀងរាល់ថ្ងៃ ក្នុងអំឡុងពេលនៃការរីករាលដាលជម្ងឺកូវីដ ១៩ សរុបប្រមាណ ៦៣.២៦៩នាក់ មានស្រ្តីប្រមាណ ២៧.១៦២នាក់។ចំពោះពលករចំណាកស្រុក ត្រឡប់មកពីក្រៅប្រទេសវិញ ទាំងស្របច្បាប់ និងមិនស្របច្បាប់ សរុបចំនួន ១៥០.៨៨៥នាក់ ដែលក្នុងនោះមានស្ត្រី៥៤.៥៥៦នាក់ និង អនីតិជន៥៦៤នាក់ មានស្រី១៥៧នាក់៕
