ភ្នំពេញ៖ ក្រសួងកសិកម្មរុក្ខប្រមាញ់ និងនេសាទ បានរៀបចំដើម្បីដាក់បញ្ជូលដំណាំមៀនប៉ៃលិន ឬតាង៉ែន ជាដំណាំអទិភាពទី៣ បន្ទាប់ពីដំណាំស្វាយ ដំណាំចេក ទៅកាន់ទីផ្សារប្រទេសចិន។នេះបើតាមប្រសាសន៍របស់ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
ឯកឧត្តម វេង សាខុន បានថ្លែងប្រាប់សារព័ត៌មានស៊ីស៊ីថាមស៍ថា ដំណាំមៀនប៉ៃលិន ភាគច្រើនដាំនៅលើទឹកដីខេត្តប៉ៃលិន និងខេត្តបាត់ដំបង ក្រៅពីនឹងដាំនៅខេត្តកំពង់ចាម ខេត្តព្រះវិហារ ខេត្តកំពង់ធំមានចំនួនតិចតួចប៉ុណ្ណោះ។
មូលហេតុដែលក្រសួងសម្រេចយក«មៀនប៉ៃលិន» ឯកឧត្តម វេង សាខុន ពន្យល់ថា ជាដំណាំយុទ្ធសាស្ត្រដែលប្រទេសចិនត្រូវការ ខណៈប្រទេសជិតខាងកម្ពុជាក៏បាននាំចេញទៅចិនផងដែរ។ក្រសួងកសិកម្មបានស្នើដាក់ជាកញ្ចប់ទៅខាងភាគីចិន តែភាគីចិនឱ្យកម្ពុជាស្នើដាក់ដំណាំម្ដងមួយមុខៗ ព្រោះភាគីចិនទាមទារចុះដល់ចម្ការ និងរៀបចំហេដ្ឋារចនាសម្ព័ន្ធ តាមស្ដង់ដារដែលជាតម្រូវការរបស់ភាគីចិន។
ឯកឧត្តមមានប្រសាសន៍ថា៖«ភាគីចិនបញ្ចៀសនៅភាពស្មុគស្មាញដោយរៀបចំ និងត្រួតពិនិត្យពីដើមដល់ចប់ ចាប់តាំងពីការរៀបចំហេដ្ឋារចនាសម្ព័ន្ធក្នុងចម្ការ ការថែទាំដំណាំ ការសម្អាត ការវេចខ្ចប់ ការស្តុកទុក និងការកម្ចាត់សមាសភាពចង្រៃជាដើម»។
ឯកឧត្តមបន្តថា ដើម្បីជៀសវាងបញ្ហាលំបាក គឺភាគីចិនសម្រេចទទួលទិញម្ដងមួយមុខៗ ខណៈផ្លែមៀនប៉ៃលិន គឺជាកញ្ចប់ទី៣ក្នុងចំណោមកញ្ចប់ផ្លែឈើផ្សេងទៀតរបស់កម្ពុជា ដែលធ្លាប់បានដាក់ចេញលក់រួចមកហើយ។
សូមជម្រាបជូនថា បច្ចុប្បន្នកម្ពុជាមានផ្ទៃដីដាំដុះផ្លែឈើមៀនប៉ៃលិនប្រមាណ ១៤ ៥០០ ហិកតា និងមានផ្ទៃដីប្រមូលផលរហូត១ ៥០០ ហិកតាជាង ចំណែកក្នុងមួយឆ្នាំៗដំណាំហូបផ្លែប្រភេទមៀន ឬតាង៉ែន អាចប្រមូលផលបាន ២០ម៉ឺនតោន។ ដោយឡែកឆ្នាំកន្លងទៅ កម្ពុជាបាននាំចេញទៅក្រៅប្រទេសចំនួន១០ម៉ឺនតោនផងដែរ ។
ចំពោះទីផ្សារប្រទេសចិនវិញ ក្រសួងកសិកម្មរំពឹងថា ដំណាំ«មៀនប៉ៃលិន»នឹងក្លាយជាទំនិញអទិភាពទី៣ បន្ទាប់ពីផ្លែស្វាយស្រស់ ផ្លែស្វាយស្រស់ ហើយបើកម្ពុជាអាចនាំចេញទៅចិនដោយផ្ទាល់ ដំណាំផ្លែឈើហូបផ្លែនេះគឺអាចរកប្រាក់ចំណូលពី១៥០ ទៅ ២០០លានដុល្លារសហរដ្ឋអាមេរិកក្នុងមួយឆ្នាំៗ៕
.jpg?1609816361)
