![](https://cdn.cc-times.com/kh.cc-times.com/media/567/large/89896291_2822148234546637_8362975845630869504_o.jpg?1584340636)
បាត់ដំបង៖ ចំនួនភ្ញៀវទេសចរចូលរួមក្នុងពិធីបុណ្យទន្លេលើកទី៦ នៅខេត្តបាត់ដំបង មានការធ្លាក់ចុះ ដោយរយៈពេល៣ថ្ងៃ ចាប់ពីថ្ងៃទី១៣-១៥ ខែមីនានេះ មានប្រជាពលរដ្ឋនិងភ្ញៀវទេសចរចូលរួមទស្សនាប្រមាណជិត៣០ម៉ឺននាក់ ខណៈបុណ្យទន្លេកាលពីឆ្នាំមុន ដែលធ្វើនៅខេត្តកំពង់ឆ្នាំង មានភ្ញៀវទេសចរចូលរួមប្រមាណជាង ១លាននាក់។
លោក តុប សុភ័ក អនុរដ្ឋលេខាធិការនៃក្រសួងទេសចរណ៍ បានពន្យល់ប្រាប់ស៊ីស៊ីថាមស៍នៅថ្ងៃនេះថា មូលហេតុដែលបណ្តាលឲ្យធ្លា្កក់ចុះនៃចំនួនចំនួនភ្ញៀវទេសចរចូលរួមក្នុងពិធីបុណ្យទន្លេ បើប្រៀបធៀបកាលពីឆ្នាំមុន គឺអាស្រ័យលើខេត្តនីមួយៗ មានចំនួនចូលរួមខុសគ្នាៗ ហើយដោយសារបច្ចុបន្ននេះ មានប្រជាពលរដ្ឋ និងភ្ញៀវទេសចរមិនចង់ចូលរួមព្រោះមានអារម្មណ៍ថាភ័យខ្លាចទាក់ទងនឹងបញ្ហាការរីករាលដាល Covid-19។
លោក តុប សុភ័ក បានបន្ថែមទៀតថា ទោះបីជាចំនួនអ្នកចូលរួមក្នុងពិធីបុណ្យទន្លេឆ្នាំនេះ មានការធ្លាក់ចុះក៏ដោយ ក៏កម្មវិធីប្រព្រឹត្តទៅដោយរលូន និងជោគជ័យយ៉ាងត្រចេះត្រចង់ ដោយប្រជាពលរដ្ឋនិងភ្ញៀវទេសចរចូលរួមទស្សនាយ៉ាងសប្បាយរីករាយ ខណៈបញ្ហាសន្តិសុខសណ្ដាប់ធ្នាប់ក៏គ្មានអ្វីកើតឡើងគួរឱ្យកត់សម្គាល់នោះដែរ។
គួរបញ្ជាក់ដែរថា រយៈពេលបីថ្ងៃមកនេះ បុណ្យទន្លេបានទទួលវត្តមានភ្ញៀវទេសចរ និងប្រជាពលរដ្ឋចូលរួមទស្សនាប្រមាណជិត៣០ម៉ឺននាក់ ក្នុងនោះមានភ្ញៀវបរទេសប្រមាណ ១៣០០នាក់ ដោយនៅថ្ងៃទីមួយទទួលបានប្រមាណជាង៣ម៉ឺននាក់ នៅថ្ងៃទីពីរទទួលបានវត្តមានប្រជាពលរដ្ឋ និងភ្ញៀវទេសចរប្រមាណជាង១០ម៉ឺននាក់ ចំណែកនៅថ្ងៃបិទបញ្ចប់នេះទទួលបានប្រមាណជាង ១៦ម៉ឺននាក់ទៀត៕
![](https://cdn.cc-times.com/kh.cc-times.com/media/568/large/89931194_2822150571213070_9027313574430638080_o.jpg?1584340855)
![](https://cdn.cc-times.com/kh.cc-times.com/media/569/large/90077166_2822151144546346_5108356015061991424_o.jpg?1584340855)
![](https://cdn.cc-times.com/kh.cc-times.com/media/570/large/90297390_2822150997879694_4440354833777557504_o.jpg?1584340856)
![](https://cdn.cc-times.com/kh.cc-times.com/media/571/large/90419398_2822151551212972_372505447044743168_o.jpg?1584340856)