ភ្នំពេញ៖ ក្រោយចប់បាក់ឌុប២០២៦នេះ ក្រោយមិនទទួលបានអាហារូបករណ៍ យុវតី ធា ម៉ារិន និងគ្រួសារបានសម្រេចលក់ម៉ូតូតម្លៃ ៧០០ដុល្លារ ដើម្បីអាចបន្តក្តីស្រមៃមករៀននៅភ្នំពេញ។ បច្ចុប្បន្ន ម៉ារិន កំពុងសិក្សាឆ្នាំទី១ ជំនាញនីតិសាស្ត្រ និងមានក្តីស្រមៃចង់ក្លាយជាស្ត្រីម្នាក់ដែលមានចំណេះដឹង ភាពក្លាហាន និងសមត្ថភាពចូលរួមបម្រើសង្គម។
ម៉ូតូចាស់មួយគ្រឿងនោះ មិនមែនគ្រាន់តែជាយានជំនិះធម្មតានោះឡើយ តែវាជាញើសឈាមដែលឪពុកម្តាយបានខិតខំសន្សំប្រាក់រាប់ឆ្នាំដើម្បីទិញឱ្យ ម៉ារិន កាលពីនៅរៀនថ្នាក់ទី ១០។ ក្រោយជាប់បាក់ឌុប២០២៦ថ្មីៗនេះ តែមិនបានអាហារូបករណ៍ គ្រួសារម៉ារិន បានបង្ខំចិត្តលក់ម៉ូតូនោះក្នុងទឹកប្រាក់ ៧០០ ដុល្លារ ដើម្បីដូរយកការសិក្សាថ្នាក់សាកលវិទ្យាល័យ១ឆមាស និងសល់ខ្លះសម្រាប់ផ្គត់ផ្គង់ការសិក្សាបណ្តោះអាសន្នមួយគ្រាសិន ដោយសារតែគ្រួសារព្យាយាមស្វះស្វែងគ្រប់វិធី តែនៅតែមិនគ្រប់គ្រាន់ក្នុងការបញ្ជូនម៉ារិន មករៀនតនៅភ្នំពេញ។
ធ្វើដំណើរជិត៥០០គីឡូម៉ែត្រ ពីស្រុកកំណើត នៅខេត្តស្ទឹងត្រែង ដើម្បីមានឱកាសរៀនតនៅសាកលវិទ្យាល័យនៅភ្នំពេញ ម៉ារិន បានថ្លែងប្រាប់ស៊ីស៊ីថាមស៍ថា «ខ្ញុំកើតនៅក្នុងគ្រួសារមួយដែលមានបរិបទថា កូនត្រូវតែក្លាហាន កូនត្រូវតែរឹងមាំ ហើយបន្តការសិក្សាឱ្យបានចប់គ្រប់ៗគ្នា។ ដូច្នេះហើយ ម៉ាក់ប៉ារបស់ខ្ញុំ គឺគាត់លើកទឹកចិត្តឱ្យកូនគាត់បានរៀនសព្វគ្រប់ៗគ្នា មិនថាក្នុងស្ថានភាពលំបាកបែបណា។»៕
ទស្សនាវីដេអូបទយកការណ៍៖
