ភ្នំពេញ៖ គម្រោងសាងសង់ស្ពានឆ្លងទន្លេបាសាក់ តភ្ជាប់ពីចាក់អង្រែក្រោម-ព្រែកប្រា សម្រេចការសាងសង់បាន ៨២% គិតត្រឹមពាក់កណ្ដាលខែសីហា ឆ្នាំ២០២៦នេះ លឿនជាងផែនការគ្រោងទុក ហើយគ្រោងបញ្ចប់នៅពាក់កណ្ដាលឆ្នាំ២០២៧ខាងមុខនេះ។ នេះបើតាមការបញ្ជាក់របស់លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន។
លោក ផន រឹម បានលើកឡើងថា បន្ថែមលើការងារស្ពាន បច្ចុប្បន្នក្រុមការងារកំពុងគិតគូរពីការតភ្ជាប់គម្រោងសាងសង់ស្ពានឆ្លងកាត់ទន្លេបាសាក់(ចាក់អង្រែក្រោម-ព្រែកប្រា) ត្រើយខាងកើត ភ្ជាប់ទៅផ្លូវជាតិលេខ១។
អ្នកនាំពាក្យរូបនេះបន្តថា យោងតាមការណែនាំដ៏ខ្ពង់ខ្ពស់របស់សម្តេច ហ៊ុន ម៉ាណែត ក្នុងពេលសម្ពោធបើកការដ្ឋានសាងសង់ស្ពានឆ្លងកាត់ទន្លេបាសាក់(ចាក់អង្រែក្រោម-ព្រែកប្រា) កាលពីថ្ងៃទី១៩ខែកុម្ភៈ ឆ្នាំ២០២៤ បានជំរុញឱ្យក្រសួងសាធារណការ និងដឹកជញ្ជូន និងរដ្ឋបាលរាជធានីភ្នំពេញ សិក្សាដើម្បីស្វែងរកតម្រាយផ្លូវតភ្ជាប់ទៅផ្លូវជាតិលេខ១ ដើម្បីបង្កើនប្រសិទ្ធភាពនៃការតភ្ជាប់រំហូរចរាចរណ៍ និងប្រទាក់ក្រឡាគ្នារវាងផ្នែកខាងលិច និងខាងកើតនៃស្ពាន។
ផ្នែកពាក់ព័ន្ធបានចុះពិនិត្យសិក្សារួមគ្នាជាបន្តបន្ទាប់រវាងក្រសួង ស្ថាប័ន អាជ្ញាធរមូលដ្ឋាន និងក្រុមហ៊ុនប៉េងហួតគ្រុប និងដោយមានការឯកភាពពីថ្នាក់ដឹកនាំ បានឯកភាពយកតម្រាយគន្លងផ្លូវចាស់ ប្រវែង ៤ ៩០០ម. ភ្ជាប់ទៅផ្លូវជាតិលេខ១ និងភ្ជាប់ទៅគម្រោងស្ពានទន្លេមេគង្គកោះនរាដែលកំពុងសិក្សាផងដែរ។
តម្រាយគន្លងផ្លូវប្រវែង ៤ ៩០០ម.នេះ ផ្លូវដែលមានស្រាប់សាងសង់ដោយក្រុមហ៊ុនប៉េងហួតគ្រុប មានប្រវែង ៣ ៣០៩ម. នៅខ្វះតែប្រវែង ១ ៥៩១ម. ប៉ុណ្ណោះ ដែលរាជរដ្ឋាភិបាលត្រូវសាងសង់បន្តដើម្បីតភ្ជាប់ទៅផ្លូវជាតិលេខ១ ដោយពង្រីកទទឹងផ្លូវប្រវែង ១៦ម. កាត់បន្ថយផលប៉ះពាល់។ ការសាងសង់កំណាត់ផ្លូវតភ្ជាប់នេះ នឹងផ្តល់ប្រយោជន៍នៃការធ្វើដំណើរងាយស្រួលជាងមុន មិនកកស្ទះ និងមានសុវត្ថិភាព ព្រមទាំងបញ្ចៀសការលិចលង់ក្នុងរដូវវស្សាតាមរយៈការសាងសង់ស្ថានីយបូមមួយកន្លែង។ នេះបើតាមការបញ្ជាក់របស់លោក ផន រឹម។
គួរបញ្ជាក់ថា ស្ពានចាក់អង្រែក្រោម-ព្រែកប្រា សម្ពោធបើកការដ្ឋាននៅព្រឹកថ្ងៃទី១៩ ខែកុម្ភៈ ឆ្នាំ២០២៤ ក្រោមអធិបតីភាពដ៏ខ្ពង់ខ្ពស់សម្តេច ហ៊ុន ម៉ាណែត នាយករដ្ឋមន្ត្រី និងលោក វ៉ាង វិនធៀន អតីតឯកអគ្គរដ្ឋទូតចិនប្រចាំកម្ពុជា។ តាមប្រតិទិន ដំណើរការស្ថាបនាមិនមានភាពយឺតយ៉ាវជាងកម្មវិធីការងារដែលគ្រោងទុកទេ ដោយត្រៀមបញ្ចប់នៅចុងឆ្នាំ២០២៧ខាងមុខ។ នេះបើតាមការបញ្ជាក់របស់អ្នកនាំពាក្យរូបនេះ៕
