រដ្ឋាភិបាលសម្រេចកំណត់ «ទិវាជាតិសង្គមកិច្ច» ប្រារព្ធនៅថ្ងៃ ១៩ មីនា ជារៀងរាល់ឆ្នាំ

ភ្នំពេញ៖ រដ្ឋាភិបាលបានកំណត់ថ្ងៃទី ១៩ មីនា ជា «ទិវាជាតិសង្គមកិច្ច» ដើម្បីបង្ហាញអំពីការយកចិត្តទុកដាក់ និងការប្តេជ្ញាចិត្តដ៏មោះមុតរបស់រាជរដ្ឋាភិបាល ក្នុងការចូលរួមជាមួយនឹងពិភពលោក ដើម្បីរួមចំណែកធ្វើឱ្យសេវាសង្គមកាន់តែល្អប្រសើរឡើង ឆ្លើយតបទៅ នឹងតម្រូវការជាក់ស្ដែងរបស់ជនរងគ្រោះ និងជនងាយរងគ្រោះ សំដៅការពារយុត្តិធម៌សង្គម ការអភិវឌ្ឍសង្គម ដោយផ្អែកលើសិទ្ធិមនុស្ស ។

នៅឆ្នាំ២០២៥ នេះរាជរដ្ឋាភិបាល ប្រារព្ធទិវាជាតិសង្គមកិច្ចលើកទី១និងទិវាសង្គមកិច្ចពិភពលោកលើកទី១៨ ក្រោមប្រធានបទ «ពង្រឹងសាមគ្គីភាព អន្តរជំនាន់ដើម្បីធានាបានសុខុមាលភាពយូរអង្វែង» ក្នុងគោលបំណងបង្ហាញអំពីលទ្ធផលការងារនៃការផ្ដល់ សេវាសង្គមកិច្ចរបស់ប្រទេសកម្ពុជាក៏ដូចជាពិភពលោក និងបង្ហាញអំពីការយកចិត្តទុកដាក់របស់រាជរដ្ឋាភិបាល ចំពោះកម្លាំងសេវាសង្គមដែលបានលះបង់ពេលវេលា ចំណេះដឹង និងជំនាញជួយដល់ប្រជាជនក្រីក្រ ជនរងគ្រោះ និងងាយរងគ្រោះ ក៏ដូចជាបង្កើនតម្លៃនិងលើកកម្ពស់ការយល់ដឹងជាសាធារណៈអំពីការងារសង្គមកិច្ច និងតួនាទី ដ៏សំខាន់របស់កម្លាំងសេវាសង្គម។

បើតាមសារលិខិត សម្តេច ហ៊ុន ម៉ាណែត ក្នុងឱកាសទិវាជាតិសង្គមកិច្ច ការប្រារព្ធទិវានេះនឹងចូលរួមចំណែកក្នុងការកសាងពិភពលោកមួយដែលផ្តល់ក្តីមេត្តា ក្តីស្រឡាញ់ សន្តិភាព សំដៅពង្រឹងសុខុមាលភាពសង្គមកាន់តែល្អប្រសើរនិងយូរអង្វែងសម្រាប់មនុស្សគ្រប់ៗរូប។ គុណតម្លៃនៃសន្តិភាពនិងសាមគ្គីភាព ជាមូលដ្ឋានគ្រឹះសម្រាប់ការអភិវឌ្ឍ ការរក្សាស្ថិរភាពសង្គម និងបន្តខិតខំដោះស្រាយបញ្ហាប្រឈមនានា ដើម្បីសម្របខ្លួននិងឆ្លើយតបប្រកបដោយបុរេសកម្មឱ្យទាន់សភាពការណ៍សង្គម សេដ្ឋកិច្ចសកល និងតំបន់ ជាពិសេសចាប់ឱ្យជាប់នូវកាលានុវត្តភាព ដែលអាចលេចចេញ ក្នុងបរិការណ៍នៃការផ្លាស់ប្តូរយ៉ាងឆាប់រហ័សនៃនិម្មាបនកម្មសង្គម សេដ្ឋកិច្ចសកល។

សម្តេច ហ៊ុន ម៉ាណែត មានជំនឿយ៉ាងមុតមាំថា ពិធីអបអរសាទរ «ទិវាជាតិសង្គមកិច្ច» និង «ទិវាសង្គមកិច្ច ពិភពលោក» ឆ្នាំនេះ នឹងបង្ហាញឱ្យឃើញកាន់តែច្បាស់អំពីឆន្ទៈ និងការប្តេជ្ញាចិត្តកាន់តែក្លៀវក្លារបស់ រាជរដ្ឋាភិបាល សមាគម អង្គការមិនមែនរដ្ឋាភិបាលក្នុងស្រុកនិងបរទេស និងអ្នកធ្វើការជាកម្លាំងសេវាសង្គម នឹងខិតខំធ្វើការ រួមគ្នាបង្កើនចំណងសាមគ្គីភាព លើកកម្ពស់កិច្ចសហប្រតិបត្តិការ និងចែករំលែក ចំណេះដឹងបទពិសោធពីជំនាន់មួយទៅជំនាន់មួយ សំដៅកសាងសង្គមមួយឱ្យមានការអភិវឌ្ឍគ្រប់ជ្រុងជ្រោយ ជាពិសេសការធ្វើឱ្យប្រសើរឡើងនូវសុខុមាលភាពកាន់តែល្អប្រសើរ ភាពធន់ និងចីរភាព។

ទិវាសង្គមកិច្ចពិភពលោកត្រូវបានផ្តួចផ្តើមរៀបចំដំបូងនៅក្នុងខែមីនា ឆ្នាំ១៩៨៣ ដោយសហព័ន្ធសង្គមកិច្ចអន្តរជាតិ នៅទីស្នាក់ការអង្គការសហប្រជាជាតិ ទីក្រុងញូវយ៉ក។ នៅឆ្នាំ២០០៤ មហាសន្និបាតរបស់សហព័ន្ធសង្គមកិច្ចអន្តរជាតិបានសម្រេចទទួលស្គាល់ជាផ្លូវការជាទិវាសង្គមកិច្ចពិភពលោក ហើយបណ្តាប្រទេសជាសមាជិក សហព័ន្ធសង្គមកិច្ចអន្តរជាតិចាប់ផ្តើមប្រារព្ធទិវានេះលើកដំបូងរៀងៗខ្លួននៅឆ្នាំ២០០៧ ក្នុងគោលបំណងបង្ហាញ អំពីសមិទ្ធផលនៃការងារសង្គម ដែលរួមចំណែកធ្វើឱ្យសេវាសង្គមកាន់តែប្រសើរឡើង ការការពារយុត្តិធម៌សង្គម ការអភិវឌ្ឍសង្គម និងសិទ្ធិមនុស្ស ឆ្លើយតបទៅនឹងតម្រូវការជាក់ស្ដែងរបស់ជនរងគ្រោះ និងជនងាយរងគ្រោះ។ ដោយឡែកនៅព្រះរាជាណាចក្រកម្ពុជា ទិវានេះបានរៀបចំឡើងដំបូងនៅឆ្នាំ២០១០ ដោយដេប៉ាតឺម៉ង់ សង្គមកិច្ចវិទ្យានៃសាកលវិទ្យាល័យភូមិន្ទភ្នំពេញ ហើយបន្ទាប់មករៀបចំដោយសមាគមអ្នកវិជ្ជាជីវៈសង្គមកិច្ច កម្ពុជា។ ចាប់ពីឆ្នាំ២០១៩ ទិវានេះត្រូវបានរៀបចំឡើងដោយក្រសួងសង្គមកិច្ច អតីតយុទ្ធជន និងយុវនីតិសម្បទា ដោយសហការជាមួយអង្គការ សមាគម និងដៃគូអភិវឌ្ឍពាក់ព័ន្ធ។

គួរបញ្ជាក់ថា កាលពីខែមីនា ឆ្នាំ២០២៤កន្លងទៅ ក្រសួង សង្គមកិច្ច អតីតយុទ្ធជន និងយុវនីតិសម្បទា បានរៀបចំទិវានេះក្រោមប្រធានបទ «រួមគ្នាដើម្បីអនាគតដ៏ប្រសើរ» ជាលទ្ធផល ទិវានេះមានការសាទរនិងគាំទ្រយ៉ាងខ្លាំងពីមជ្ឈដ្ឋានទូទៅ ជាពិសេសពីសំណាក់បុគ្គលិកសង្គម របស់រដ្ឋ និងអង្គការដៃគូដែលបានចូលរួមបម្រើសេវាសង្គមកិច្ចជួយដល់ជនរងគ្រោះនិងងាយរងគ្រោះនៅកម្ពុជា៕

អត្ថបទទាក់ទង