ស.ស.យ.ក ប្រកាសដាក់ឲ្យដំណើរប័ណ្ណសមាជិក និង APP ជាផ្លូវការ

ភ្នំពេញ៖ ក្រុមគ្រួសារ ស.ស.យ.ក. (សហភាពសហព័ន្ធយុវជនកម្ពុជា Union of Youth Federations of Cambodia) បានប្រកាសបើកដំណើរការប័ណ្ណសមាជិកភាពរបស់ខ្លួន និងកម្មវិធីApp ស.ស.យ.ក. ជាផ្លូវការហើយ។ ក្នុងគោលបំណងនៃការដាក់ឱ្យដំណើរការទាំងអស់េនះ គឺសម្រាប់ជាប្រយោជន៍ជាច្រើន ហើយបងប្អូនមហាជនអាចប្រើប្រាស់បណ្ឌ និងកម្មវិធី APP នោះសម្រាប់ការប្រាស្រ័យទាក់ទងគ្នា ដើម្បីធានាបាននូវភាពឆាប់រហ័ស និងមានប្រសិទ្ធភាពខ្ពស់នាថ្ងៃមុខជាមួយទំនើបកម្មបច្ចេកវិទ្យា ជីវភាពបែបថ្មី ក្នុងបរិបទបដិវត្តន៍ឧស្សាហកម្មទី៤។

នៅថ្ងៃទី២៨ ខែសីហា ឆ្នាំ២០២០ ក្រុមគ្រួសារស.ស.យ.ក. មានមោទកភាព បានប្រកាសបើកដំណើរការប្រព័ន្ធប័ណ្ណសមាជិកភាពស.ស.យ.ក. និងកម្មវិធី App របស់ ស.ស.យ.ក. ជាផ្លូវការ។ ហើយថ្ងៃនេះដែរ ជាថ្ងៃនៃការថ្លែងអំណរគុណ ចំពោះសមាជិក សមាជិការបស់យើងគ្រប់ៗរូប ជាមួយប័ណ្ណសមាជិកភាពនេះ ក្រុមគ្រួសារស.ស.យ.ក. បានបង្ហាញយ៉ាងច្បាស់ពីមោទកភាព ចំពោះអតីតកាល និងសមិទ្ធផលរបស់ខ្លួននាពេលកន្លងមក និងបោះជំហានប្រកបដោយភាពមោះមុត ទៅកាន់អនាគតជាមួយទំនើបកម្មបច្ចេកវិទ្យា ជីវភាពបែបថ្មី ក្នុងបរិបទបដិវត្តន៍ឧស្សាហកម្មទី៤ និងអនាគតដ៏ភ្លឺស្វាងនិងប្រកបដោយក្តីសង្ឃឹមរបស់កម្ពុជា។

ដំណើរវិវឌ្ឍន៍របស់ស.ស.យ.ក. រយៈពេល ០៧ឆ្នាំចុងក្រោយនេះ ក្រុមគ្រួសារស.ស.យ.ក. បានរួមចំណែកយ៉ាងសកម្ម ប្រកបដោយឆន្ទៈមោះមុត ក្នុងបុព្វហេតុសង្គមជាតិ ដែលសម្រេចបាននូវសមិទ្ធផលជាច្រើនលើគ្រប់វិស័យ ហើយបានធ្វើឲ្យមហាជនគាំទ្រ និងទទួលស្គាល់ជាបន្តបន្ទាប់។

លោក ហ៊ុន​ ម៉ានី បានថ្លែងថា «ក្រុមគ្រួសារស.ស.យ.ក. និងសមាជិក សមាជិកា យើងបានបោះជំហានថ្មីមួយទៀត ចេញពីស្មារតី២ធ្នូដែលជាស្មារតីនៃការស្ម័គ្រចិត្ត ខិតខំ តស៊ូ ប្រឹងប្រែងរបស់បុព្វបុរសយើងដើម្បីសង្គមជាតិ»។

ជាមួយគ្នានេះដែរ ក្រុមគ្រួសារស.ស.យ.ក. រីករាយជាមួយភាពសម្បូរបែបសម្រាប់ការប្រាស្រ័យទាក់ទង ក៏ដូចជាអត្ថប្រយោជន៍ជាច្រើន ហើយបងប្អូនមហាជនក៏អាចចុះឈ្មោះចូលជាសមាជិកតាមរយៈប្រព័ន្ធអនឡាញ បានឆាប់រហ័ស និងមានប្រសិទ្ធភាពខ្ពស់៕