ភ្នំពេញ៖ គិតមកដល់ពេលបច្ចុប្បន្ននេះ គម្រោងសាងសង់ថ្មីធំៗនៅក្នុងរាជធានីភ្នំពេញនៅតែបន្តដំណើរការជាបន្តបន្ទាប់ ដោយសរុបក្នុងរយៈពេលចុងក្រោយគិតពីពាក់កណ្តាលឆមាសឆ្នាំ២០២០ នៅទូទាំងរាជធានីមានអគារធំៗចំនួន១២៩៤គម្រោង ហើយមានបុរី២៤៤គម្រោង។ នេះបើតាមប្រសាសន៍របស់លោក សារិន វណ្ណា ប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដី។
លោក សារិន វណ្ណា បានថ្លែងប្រាប់ស៊ីស៊ីថាមស៍នៅថ្ងៃនេះថា មន្ទីររៀបចំដែនដីនគរូបនីយកម្ម សំណង់ និងសុរិយោដី នៅតែបន្តអនុញ្ញាតចេញនូវលិខិតគម្រោងសាងសង់ថ្មីនៅទូទាំងប្រទេស ដើម្បីឲ្យមានដំណើរការជាបន្តបន្ទាប់។
បើតាមលោក សារិន វណ្ណា បានបញ្ជាក់ថា នៅក្នុងអំឡុងពេលនៃវិបត្តិកូវីដ១៩ សង្គេតឃើញថាមានការធ្លាក់ចុះ បើប្រៀបធៀបនៅក្នុងរយៈពេលដូចគ្នាកាលពីឆ្នាំមុន។ ប៉ុន្តែការធ្លាក់ចុះតែបន្តិចប៉ុណ្ណោះ ដោយយ៉ាងតិចមាន៥គម្រោងក្នុងមួយសប្តាស៍ដែលខាងមន្ទីររៀបចំដែនដីនគរូបនីយកម្ម សំណង់ និងសុរិយោដី បានទទួលពាក្យស្នើក្នុងការសាងសង់គម្រោងថ្មី។
លោក សារិន វណ្ណា បានបន្តថា សរុបក្នុងរយពេលចុងក្រោយគិតពីពាក់កណ្តាលឆមាសឆ្នាំ២០២០នៅទូទាំងរាជធានី អគារដែលមានកម្ពស់ចាប់ពីប្រាំជាន់ឡើង មាន១២៩៤គម្រោងហើយមានបុរី២៤៤គម្រោង។
ជាមួយគ្នានោះ លោក សារិន វណ្ណា បានបញ្ជាក់ថា ចំពោះក្រុមហ៊ុនដែលបានមកវិនិយោគក្នុងគម្រោងសាងសង់ថ្មីធំៗនៅភ្នំពេញច្រើនជាងគេគឺក្រុមហ៊ុនដែលមកពីប្រទេសចិន៕
