អ៊ុយក្រែនបានចាប់ផ្តើមផ្គត់ផ្គង់អគ្គិសនីដល់សហភាពអឺរ៉ុប

អ៊ុយក្រែន ៖ប្រធានាធិបតីអ៊ុយក្រែន លោក វ្ល៉ាឌីមៀ ហ្សេឡែនស្គី បាននិយាយនៅក្នុងសុន្ទរកថាតាមរយៈវីដេអូមួយ នៅល្ងាចថ្ងៃទី ៣០ ខែមិថុនា ថា អ៊ុយក្រែនបានចាប់ផ្តើមបញ្ជូនអគ្គិសនីទៅកាន់សហភាពអឺរ៉ុប តាមរយៈប្រទេសរូម៉ានីដែលជាជំហានដំបូងក្នុងការជួយសហភាពអឺរ៉ុប កាត់បន្ថយការពឹងផ្អែកលើថាមពលរុស្ស៊ី។

នាយករដ្ឋមន្ត្រីអ៊ុយក្រែន Janis Shmeigar បានចេញសេចក្តីថ្លែងការណ៍មួយដោយនិយាយថា ដំណើរការបញ្ជូនអគ្គសនីទៅកាន់សហភាពអឺរ៉ុបតាមរយៈប្រទេសរ៉ូម៉ានី បានចាប់ផ្តើមជាមួយនឹងថាមពល ១០០,០០០ គីឡូវ៉ាត់។ លោកធ្លាប់បាននិយាយថា អ៊ុយក្រែនមានសក្តានុពលក្នុងការនាំចេញថាមពលអគ្គិសនីទៅសហភាពអឺរ៉ុបរហូតដល់ទៅ ២,៥ ជីហ្គាវ៉ាត់។

លោក ហ្សេឡែនស្គី បាននិយាយថា «អគ្គិសនីដែលផ្គត់ផ្គង់ដោយអ៊ុយក្រែន អាចត្រូវបានប្រើដើម្បី ជំនួសផ្នែកដ៏សន្ធឹកសន្ធាប់នៃឧស្ម័នធម្មជាតិរបស់រុស្ស៊ី ដែលប្រើប្រាស់ដោយអឺរ៉ុប ដូច្នេះហើយ នេះមិនត្រឹមតែជាបញ្ហានៃការបង្កើនប្រាក់ចំណូលពីការនាំចេញថាមពលប៉ុណ្ណោះទេ ប៉ុន្តែថែមទាំងទាក់ទងនឹងសន្តិសុខរួមនៃអឺរ៉ុប»។

ភ្លាមៗបន្ទាប់ពីរុស្ស៊ី បានចាប់ផ្តើមប្រតិបត្តិការយោធាពិសេសប្រឆាំងនឹងអ៊ុយក្រែននៅថ្ងៃទី ២៤ ខែកុម្ភៈ អ៊ុយក្រែនបានផ្តាច់ខ្លួនចេញពី «ប្រព័ន្ធថាមពលរួមបញ្ចូលគ្នា» ដែលសមាជិករបស់ពួកគេរួមមានរុស្ស៊ី ហើយនៅពាក់កណ្តាលខែមីនា វាបានឈានដល់កិច្ចព្រមព្រៀងមួយ ដើម្បីចូលរួមជាមួយសហភាពអឺរ៉ុបនៃប្រតិបត្តិករប្រព័ន្ធបញ្ជូនថាមពល ( ENTSO-E)។

សារព័ត៌មាន Associated Press បានរាយការណ៍ថា ENTSO-E ឥឡូវនេះមានសមាជិកប្រតិបត្តិករបញ្ជូនចំនួន ៣៩ និងដំណើរការបណ្តាញទំនាក់ទំនងអន្តរធំបំផុតរបស់ពិភពលោក។

ENTSO-E បាននិយាយនៅដើមសប្តាហ៍នេះថា ពាណិជ្ជកម្មអគ្គិសនីរបស់អ៊ុយក្រែនទៅកាន់ប្រទេសស្លូវ៉ាគី និងហុងគ្រី នឹងចាប់ផ្តើមក្នុងពេលឆាប់ៗនេះផងដែរ។ ដំណាក់កាលទី ១ នៃខ្សែបណ្តាញខាងលើត្រូវបានកំណត់ ១០០,០០០ គីឡូវ៉ាត់នៃការបញ្ជូនអគ្គិសនី៕