អាម៉េរិកចង់ពង្រឹងវត្តមានយោធានៅអឺរ៉ុប ខណៈរុស្ស៊ីព្រមានឆ្លើយតប

អាម៉េរិក៖ ប្រធានាធិបតីអាមេរិក លោក ចូ បៃដិន បាននិយាយកាលពីថ្ងៃទី ២៩ ខែមិថុនាថា សហរដ្ឋអាមេរិកនឹងពង្រឹងវត្តមានយោធារបស់ខ្លួនយ៉ាងខ្លាំងនៅក្នុងទ្វីបអឺរ៉ុប និងដាក់ពង្រាយទាហាន យន្តហោះចម្បាំង និងនាវាចម្បាំងបន្ថែមទៀត។ ខណៈភាគីរុស្ស៊ីនឹងមិនព្រងើយកន្តើយ ចំពោះការពង្រីកវត្តមានយោធាអាម៉េរិកនៅអឺរ៉ុបឡើយ ហើយព្រមានពីការឆ្លើយតបចំពោះចលនានេះ។

ថ្លែងនៅទីក្រុងម៉ាឌ្រីដ ប្រទេសអេស្ប៉ាញ លោក បៃដិន បាននិយាយអំពីលោក Jens Stoltenberg អគ្គលេខាធិការនៃអង្គការសន្ធិសញ្ញាអាត្លង់ទិកខាងជើងថា «សហរដ្ឋអាមេរិកនឹងបង្កើនកងកម្លាំងរបស់ខ្លួននៅក្នុងទ្វីបអឺរ៉ុប ឆ្លើយតបទៅនឹងការផ្លាស់ប្តូរបរិយាកាសសន្តិសុខ និងពង្រឹងសន្តិសុខសមូហភាព»។

លោកបាននិយាយថា សហរដ្ឋអាមេរិកនឹងដាក់ពង្រាយយន្តហោះចម្បាំង F-35 ថ្មីចំនួនពីរនៅក្នុងចក្រភពអង់គ្លេស បង្កើនចំនួននាវាពិឃាតនៅមូលដ្ឋានទ័ពជើងទឹក Rota ក្នុងប្រទេសអេស្ប៉ាញពី ៤ ទៅ ៦ គ្រឿង និងពង្រឹងវត្តមានយោធារបស់ខ្លួននៅក្នុងប្រទេសអាល្លឺម៉ង់ និងអ៊ីតាលី។ សហរដ្ឋអាមេរិកក៏នឹងបង្កើតទីបញ្ជាការអចិន្ត្រៃយ៍កងទ័ពថ្មីក្នុងប្រទេសប៉ូឡូញ និងបន្ថែមកងទ័ព និងសព្វាវុធនៅក្នុងប្រទេសរូម៉ានី និងរដ្ឋបាល់ទិកផងដែឬ។

យោងតាមមន្ត្រីអាមេរិក បញ្ជាការកងទ័ពអចិន្ត្រៃយ៍ថ្មីរបស់សហរដ្ឋអាមេរិកនៅក្នុងប្រទេសប៉ូឡូញ មិនមែនជាវត្តមានអចិន្ត្រៃយ៍ទេ ដូច្នេះហើយមិនបំពានលើកិច្ចព្រមព្រៀងសហប្រតិបត្តិការ និងសន្តិសុខឆ្នាំ ១៩៩៧ រវាងសហរដ្ឋអាមេរិក និងរុស្ស៊ីនោះដែរ ហើយកងទ័ពប្រយុទ្ធដែលសហរដ្ឋអាមេរិកដាក់ពង្រាយទៅកាន់ប្រទេសអេស្តូនី ឡាតវី និង លីទុយអានី មានលក្ខណៈវិលជុំវិញ ហើយនឹងមិនឈរជើងជាអចិន្ត្រៃយ៍ទេ។

សហរដ្ឋអាមេរិក និងរុស្ស៊ីបានចុះហត្ថលេខាលើឯកសារមូលដ្ឋានស្តីពីទំនាក់ទំនងទៅវិញទៅមក កិច្ចសហប្រតិបត្តិការ និងសន្តិសុខរវាងសហព័ន្ធរុស្ស៊ី និងអង្គការសន្ធិសញ្ញាអាត្លង់ទិកខាងជើងក្នុងខែឧសភា ឆ្នាំ ១៩៩៧។ ក្នុងឯកសារនេះ អង្គការណាតូបានប្តេជ្ញាថា នឹងមិនដាក់ពង្រាយកងទ័ពអចិន្ត្រៃយ៍ដ៏ធំនៅក្នុងប្រទេសប៉ូឡូញ និងប្រទេសសមាជិកអឺរ៉ុបខាងកើតផ្សេងទៀតឡើយ។ រុស្ស៊ីបានសន្យាគោរពបូរណភាពទឹកដីនៃរដ្ឋសមាជិកភាគខាងកើតរបស់ណាតូ។

បន្ទាប់ពីរុស្ស៊ីបានចាប់ផ្តើមប្រតិបត្តិការយោធាពិសេសប្រឆាំងនឹងអ៊ុយក្រែននៅថ្ងៃទី ២៤ ខែកុម្ភៈ សហរដ្ឋអាមេរិកបានបង្កើនវត្តមាននៅអឺរ៉ុបពី ៨០,០០០ នាក់ទៅ ១០០,០០០ នាក់ ហើយ ណាតូគ្រោងនឹងបង្កើនចំនួនទាហានប្រតិកម្មរហ័សពី ៤០,០០០ ទៅ ៣០០,០០០ នាក់នៅឆ្នាំក្រោយ។

អនុរដ្ឋមន្ត្រីការបរទេសរុស្ស៊ី លោក Sergei Ryabkov បានចង្អុលបង្ហាញថា កិច្ចប្រជុំកំពូលរបស់ណាតូ នៅម៉ាឌ្រីដ បានលើកឡើងពីគោលនយោបាយ "ទប់ស្កាត់ការវាយលុក" របស់ណាតូចំពោះប្រទេសរុស្ស៊ី ប៉ុន្តែណាតូ និងសហរដ្ឋអាមេរិក គឺជាការគំរាមកំហែងចម្បងចំពោះសន្តិសុខអឺរ៉ុប ហើយរុស្ស៊ីចាត់ទុកការពង្រីករបស់ណាតូជា "កត្តាមិនស្ថិតស្ថេរ" ដែលប៉ះពាល់ដល់ស្ថានភាពអន្តរជាតិ។

លោក Ryabkov បានប្រាប់ TASS ថា សកម្មភាពរបស់អង្គការណាតូនៅអឺរ៉ុបខាងកើតនឹងបង្កឱ្យមានការឆ្លើយតបទៅវិញទៅមកពីប្រទេសរុស្ស៊ី។ លោកបាននិយាយថា «យើងនឹងមិនបិទភ្នែកចំពោះចលនានេះទេ ព្រោះយើងមានសមត្ថភាព និងធនធានដើម្បីដោះស្រាយ»៕