Cc time
Cct850x100 1
Itt 0  web banner

អាជ្ញាធរជាតិអប្សរាចាប់ផ្ដើមជួសជុលស្ពានបុរាណតាអោងដំណាក់កាលទីពីរ

ព័ត៌មានជាតិ
/
អ្នកយកព័ត៌មាន:
ជួន រស្មី​
/
សកម្មភាពកំពុងជួសជុលស្ពានតាអោង 

សៀមរាប៖ ក្រុមអ្នកជំនាញរបស់នាយកដ្ឋានអភិរក្សប្រាសាទក្រៅឧទ្យានអង្គរ នៃអាជ្ញាធរជាតិអប្សរា កំពុងដំណើរការជួសជុលស្ពានតាអោង ដែលជាស្ពានបុរាណមួយ កសាងឡើងនៅក្នុងសម័យអង្គរ ដែលកំពុងមានភាពទ្រុឌទ្រោមដោយសារអាយុកាល អាកាសធាតុធម្មជាតិ និងសម្ពាធនៃទម្ងន់ដែលបង្កឡើងពីមនុស្ស។នេះជាដំណាក់កាលជួសជុលលើកទីពីរ ដោយចាប់ផ្ដើមកាលពីដើមខែមេសារហូតដល់ខែសីហា ឆ្នាំ២០២២ខាងមុខ ដោយប្រើថវិកាមូលនិធិរបស់អាជ្ញាធរជាតិអប្សរា។

ការជួសជុលពង្រឹង គ្រឹះស្ពានបុរាណនេះ ក្នុងគោលបំណងជួយពង្រឹងរចនាសម្ពន្ធរបស់ស្ពានឱ្យរឹងមាំឡើងវិញផង និងរក្សាឱ្យបាននូវអាយុកាលយូរអង្វែងបន្តទៅទៀតផង ពិសេស គឺជួយសម្រួលចរន្តទឹកហូរដើម្បីបញ្ចៀសចេញពីការជន់លិច ព្រមទាំងឱ្យប្រជាពលរដ្ឋធ្វើដំណើរឆ្លងកាត់មានភាពងាយស្រួល និងទាក់ទាញភ្ញៀវទេសចរមកលេងកម្សាន្តនៅទីនេះឱ្យកាន់តែច្រើនថែមទៀតផង ។

មន្ត្រីទទួលបន្ទុកការដ្ឋានជួសជុលស្ពាន លោក ពុទ្ធ សុទ្ធ ឱ្យដឹងថា នៅផ្នែកខាងត្បូងរបស់ស្ពានតាអោង គឺមានការទ្រុឌទ្រោមខ្លាំងដូចជា ថ្ម រលុះធ្លាក់ពីរកន្លែង និងជញ្ជាំងស្ពានរហែកចេញមួយកន្លែង។ លោក ពុទ្ធ សុទ្ធ បញ្ជាក់ទៀតថា ដំណើរការជួសជុលពេលនេះ គឺ ក្រុមការងារបានធ្វើសម្រង់ប្លង់ ចុះបញ្ជីថ្ម ជួសជុលថ្ម ពង្រឹងសសរស្ពានដែលរលុះធ្លាក់ ព្រមទាំងជួសជុលជញ្ជាំងរហែកខាងកើតឱ្យត្រូវ តាមលំនាំដើមឡើងវិញ។ ជាមួយគ្នានេះដែរ ក៏មានការជួសជុលពង្រឹងបង្កាន់ដៃនាគដាក់ចូលទីតាំងដើមឡើងវិញ សរុបប្រវែង ៧០ម៉ែត្រ។

លោក ពុទ្ធ សុទ្ធ មានប្រសាសន៍ទៀតថា កត្តាដែលនាំឱ្យស្ពានតាអោងរងការខូចខាត គឺដោយអាយុកាល អាកាសធាតុធម្មជាតិ និងសម្ពាធនៃទម្ងន់ដែលបង្កឡើងពីមនុស្សជាដើម។ បច្ចុប្បន្នស្ពានបុរាណតាអោង ដែលស្ថិតនៅភូមិចុងស្ពាន ឃុំខ្វាវ ស្រុកជីក្រែង ខេត្តសៀមរាប មានសភាពចាស់ទ្រុឌទ្រោមខ្លាំងជាច្រើនផ្នែកដូចជា ប្រេះញែកចេញពីគ្នា ហើយផ្នែកកណ្តាលនៃតួស្ពានសងខាង គឺថ្មមួយចំនួនបានរលុះធ្លាក់ និងផ្នែកផ្សេងទៀតក៏កំពុងប្រឈមនឹងការរលុះធ្លាក់ដែរ។

គួរបញ្ជាក់ថា កាលពីឆ្នាំ២០២០ អ្នកជំនាញនៃអាជ្ញាធរជាតិអប្សរាធ្លាប់បានជួសជុលស្ពានតាអោងនេះម្តងមកហើយនៅដំណាក់កាលទីមួយ ដោយកាលណោះ ការជួសជុលបានធ្វើនៅផ្នែកខាងជើងដូចជា បង្កាន់ដៃនាគ ពង្រឹងជញ្ជាំងសសរចំនួន១១ និងការកាយដីកកស្ទះ ដើម្បីសម្រួលដល់ផ្លូវទឹកហូរឆ្លងកាត់៕






Khcct banner

អត្ថបទទាក់ទង