សម្តេចសខេង៖រឹតបន្តឹងច្បាប់ចរាចរណ៍មិនមែនជាការដាក់បន្ទុកលើពលរដ្ឋក្នុងពេលមានកូវីដទេ

ភ្នំពេញ៖រដ្ឋាភិបាលកម្ពុជា ប្រកាសនឹងរឹតបន្តឹតច្បាប់ចរាចរណ៍ចាប់ពីថ្ងៃទី១ ឧសភាស្អែកនេះ។ការរឹតបន្តឹងច្បាប់ចរាចរណ៍ផ្លូវគោក មិនមែនជាការដាក់បន្ទុកលើប្រជាពលរដ្ឋ ក្នុងស្ថានភាពលំបាកនៃជំងឺកូវីដ១៩ នោះទេ ប៉ុន្តែដើម្បីសេចក្ដីសុខសុវត្ថិភាព សណ្ដាប់ធ្នាប់សាធារណៈ និងសុវត្ថិភាពសង្គម។ នេះបើតាមការលើកឡើងរបស់ សម្ដេច ស ខេង តាមរយៈហ្វេស ប៊ុក ផ្លូវការក្នុងថ្ងៃនេះ។

សម្តេចស ខេង បានឲ្យដឹងថា វិធានការរឹតបន្តឹងច្បាប់ចរាចរណ៍ផ្លូវគោកនេះ គឺដាក់ចេញដើម្បីឆ្លើយតបនឹងភាពអាសន្ននៃគ្រោះថ្នាក់ចរាចរណ៍ដែលមានកំណើនយ៉ាងគំហុកកាលពីឆ្នាំកន្លងទៅ បានបណ្ដាលឱ្យមានអ្នកស្លាប់ របួសពិការ បង្កឱ្យមានកុមារកំព្រា និងការវិនាសព្រាត់ប្រាស់ក្នុងគ្រួសារ ទាំងនៅក្នុងស្ថានភាពដែលប្រទេសជាតិ បានចាកផុតពីភ្លើងសង្គ្រាម មានសន្តិភាព និងការអភិវឌ្ឍន៍ទៅហើយនោះ។

បើតាមសម្តេចព្រោះតែហេតុយ៉ាងដូច្នេះហើយបានជាគណៈកម្មាធិការជាតិសុវត្ថិភាពចរាចរណ៍ផ្លូវគោក បានសម្រេចកំណត់យកឆ្នាំ២០២០នេះ ជាឆ្នាំបង្កើនការរឹតបន្តឹងការអនុវត្តច្បាប់ជាងបណ្ដាឆ្នាំណាៗទាំងអស់។

សម្ដេចបានមានប្រសាសន៍៖« មានទស្សនៈមួយចំនួនបានលើកឡើងថាវិធានការនេះ គឺជាវិធានការត្រួតពិនិត្យរដ្ឋបាលទៅវិញ»។ ក្នុងនោះដែរ សម្ដេចបានផ្ដល់ការពន្យល់ជូនទៅវិញថា ការពិតគឺមិនដូច្នេះទេ ហើយក៏មិនមែនមានន័យថាក្រសួងមហាផ្ទៃ អគ្គស្នងការ ឬអង្គភាពនគរបាលចរាចរណ៍ដែលដឹកនាំ និងអ្នកអនុវត្តច្បាប់ចង់បានប្រាក់ពីប្រពលរដ្ឋនោះទេ ។ ផ្ទុយទៅវិញនេះគឺជាការថែរក្សាប្រាក់ និងថែរក្សាសុវត្ថិភាពជូនពលរដ្ឋទៅវិញទេ។

យ៉ាងណាក៏ដោយសម្តេច បានសង្កត់ធ្ងន់ថា សមត្ថកិច្ចនឹងមិនឃាត់ដំណើរបងប្អូនជនរួមជាតិដែលធ្វើដំណើរប្រកបដោយការគោរពច្បាប់ ដើម្បីសួរនាំរកឯកសារនោះទេ ពោលគឺឃាត់តែអ្នកដែល មិនគោរពច្បាប់ទេ។ ដូច្នេះសូមកុំមានទស្សនៈថានគរបាលឆ្លៀតយកឱកាសនេះធ្វើបាបប្រជាជន នេះគឺជាភារកិច្ចដើម្បីប្រជាជន ហើយទាល់តែឃាត់គ្រប់អ្នកដំណើរទោះគោរពច្បាប់ និងមិនគោរពច្បាប់ ដើម្បីសួរនាំរកឯកសារនោះទើបថាជាវិធានការរដ្ឋបាល ៕