ភ្នំពេញ៖ប្រមុខរាជរដ្ឋាភិបាលកម្ពុជាសម្តេច ហ៊ុន សែន នៅថ្ងៃទី ១ វិច្ឆិកានេះ បានប្រកាសបើកប្រទេសឡើងវិញលើគ្រប់វិស័យ ចាប់ពីថ្ងៃទី ០១ ខែ វិច្ឆិកា ឆ្នាំ ២០២១ នេះតទៅដោយអនុញ្ញាតឱ្យប្រជាពលរដ្ឋ និងអាជីវកម្មនានាបើកដំណើរការឡើងវិញ ហើយប្រជាពលរដ្ឋអាចធ្វើដំណើរកំសាន្តនៅទូទាំងប្រទេស។
ថ្លែងក្នុងពិធីប្រកាសបិទយុទ្ធនាការចាក់វ៉ាក់សាំងបង្ការជំងឺកូវីដ-១៩ ជុំទី១សម្រាប់ក្រុមអាយុចាប់ពី៦ឆ្នាំឡើង ក្នុងក្របខណ្ឌទូទាំងប្រទេស និង ប្រកាសបើកយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនកុមារអាយុ៥ឆ្នាំ សម្តេច ហ៊ុន សែន បានថ្លែងថា«នៅពេលនេះ ថ្ងៃនេះ យើងក៏ដូចជាចាប់ផ្តើមនូវការបើកប្រទេសឡើងវិញ បើទោះបីថាយុទ្ធសាស្ត្រទាក់ទងនឹងការរៀបចំដំណើរការនៃការបើកប្រទេសនេះ ត្រូវបានទាក់ទិនជាមួយនឹងការអភិវឌ្ឍសង្គមរបស់យើង យើងនឹងដាក់បន្ថែមនៅពេលក្រោយ»។
បើតាមសម្តេច ហ៊ុន សែន កម្ពុជាបានធ្វើការសាកល្បងរួចមកហើយ កាលពីក្នុងពិធីបុណ្យភ្ជុំបិណ្ឌ ទាក់ទិននឹងការសាកល្បងដ៏ធំ ហើយបន្ទាប់ពីការសាកល្បងនេះក៏អាចឱ្យមានការវាយតម្លៃបាន ថាតើគួរតែទៅមុខឬទៅក្រោយ។
លោកមានប្រសាសន៍ថា៖ «នៅក្នុងបញ្ហានេះ យើងបានកំណត់តាំងពីដើមទីថា នៅពេលដែលមានវ៉ាក់សាំង យើងកំណត់ការចាក់វ៉ាក់សាំង គឺជាគន្លឹះសំខាន់ បន្ទាប់ពីវិធានការដែលយើងបានធ្វើកន្លងទៅ គឺការរុករក ការធ្វើតេស្ត ការធ្វើចត្តាឡីស័ក និងការព្យាបាល»។
ជាមួយគ្នានោះ សម្តេចក៏បានលើកឡើងពីការ គួរសាកល្បងបើក ខារ៉ាអូខេឡើងវិញឬអត់?ព្រោះកម្ពុជាបានចាប់ផ្តើមរស់នៅ ក្នុងគន្លងថ្មី ជាមួយមេរោគកូវីដ១៩ហើយ ខណៈនាពេលកន្លងទៅ ការបិទខារ៉ាអូខេនេះ មានស្ត្រីភាគច្រើនបានសម្តែងការគាំទ្រ និងត្រេកអរនោះ៕