បន្ទាយមានជ័យ៖ ជំនន់ទឹកភ្លៀងកំពុងលិចគ្របដណ្តប់ហេដ្ឋារចនាសម្ព័ន្ធផ្លូវថ្នល់ជាច្រើននៅក្នុងក្រុងប៉ោយប៉ែត បន្ទាប់ពីមានភ្លៀងធ្លាក់ជាប់ៗគ្នាប៉ុន្មានថ្ងៃមកនេះ ដោយសារឥទ្ធិពលព្យុះ។ រហូតមកទល់ថ្ងៃនេះ ផ្ទៃមេឃនៅក្រុងប៉ោយប៉ែតនៃខេត្តបន្ទាយមានជ័យ នៅមិនទាន់ស្រឡះនៅឡើយ ទឹកភ្លៀងរលឹមនៅតែបន្តធ្លាក់ ក្នុងកំរិតខ្លាំងបណ្តាលឱ្យជន់លិចលំនៅឋាន ផ្លូវមួយចំនួនក្នុងក្រុង និងទឹកតាមអូរព្រំដែនឡើងខ្ពស់បណ្តាលឱ្យលិចលំនៅឋាន រហូតឈានដល់ ជម្លៀសប្រជាពលរដ្ឋមួយចំនួនមកកាន់ទីទួលសុវត្ថិភាព។
បើតាមរដ្ឋបាលក្រុងប៉ោយប៉ែត អាជ្ញាធរក្រុង សង្កាត់ ភូមិ និងកងកម្លាំងសហការគ្នា ខិតខំបើកកាយមុខទឹកយ៉ាងណាក៏ដោយ ទឹកនៅតែពុំអាចស្រកបានលឿនដដែល ក៏ប៉ុន្តែមិនមានបញ្ហាគ្រោះថ្នាក់ដល់អាយុជីវិតមនុស្ស និងសត្វ ឬខូចខាតទ្រព្យសម្បត្តិអ្វីនៅឡើយ។បច្ចុប្បន្ននេះអាជ្ញាធរកំពុងត្រៀមលក្ខណៈ ដើម្បីបញ្ចៀសហានិភ័យជាយថាហេតុផ្សេងទៀត ដែលអាចកើតឡើង ដោយសារតែបញ្ហាអាកាសធាតុ។
រដ្ឋបាលក្រុង បានអំពាវនាវដល់ប្រជាពលរដ្ឋចូលរួម និងបង្កើនការប្រុងប្រយ័ត្នដោយជួយកាយសំរាមតាមមុខលូ តាមមុខផ្ទះរៀងខ្លួន វេចខ្ចប់ទុកដាក់សំរាម ឱ្យបានត្រឹមត្រូវ បង្កើនការប្រុងប្រយ័ត្នចំពោះក្មេងតូចៗ កុំឱ្យលេងទឹក សត្វមានពិស និងទុកដាក់ទំនិញ សម្ភារៈប្រើប្រាស់ខ្ពស់ ត្រូវរៀបចំ ខ្សែភ្លើង ឬបិទចរន្តអគ្គិសនី ហាមទៅលេងទឹកតាមកន្លែងមានទឹកហូរខ្លាំង៕
