ភ្នំពេញ៖ សមាគមរោងចក្រកាត់ដេរនៅកម្ពុជាហៅកាត់ថា GMAC ចេញសេចក្ដីណែនាំឱ្យម្ចាស់រោងចក្រទាំងអស់ពិនិត្យសុខភាពបុគ្គលិកដែលត្រលប់មកពីប្រទេសចិនវិញ។ការស្នើសុំនេះធ្វើឡើងខណៈដែលមេរោគ«កូរ៉ូណា» កំពុងផ្ទុះឡើងនៅប្រទេសចិនដែលជាក្តីបារម្ភនៅក្នុងវិស័យឧស្សាហកម្មនៅកម្ពុជា។
ក្នុងសេចក្តីណែនាំសមាគមរោងចក្រកាត់ដេរនៅកម្ពុជា បានស្នើសុំដល់សមាជិកថា ប្រសិនបើរោងចក្រណាមានបុគ្គលិកដែលត្រឡប់មកពីប្រទេសចិនមកកម្ពុជាវិញ សូមពិនិត្យពួកគេដោយយកចិត្តទុកដាក់ និង ដាក់ពួកគេឲ្យនៅដាច់ដោយឡែកពីបុគ្គលិកដទៃនិងកម្មករយ៉ាងហោចណាស់១៤ថ្ងៃ។
បន្ទាប់ពីរយៈពេល១៤ថ្ងៃ ប្រសិនបើរកមិនឃើញឬមិនមានរោគសញ្ញាផ្ទុកវីរុសកូរ៉ូណាទេ នឹងអនុញ្ញាតឱ្យពួកគេត្រឡប់ចូលធ្វើការក្នុងរោងចក្រវិញ ប៉ុន្តែត្រូវរៀបចំផ្តល់ម៉ាស់សុវត្ថិភាពនិងទឹកលាងដៃសម្រាប់បុគ្គលិក និងភ្ញៀវដែលទៅរោងចក្រ។
លោក កេន លូ អគ្គលេខាធិការនៃសមាគមរោងចក្រកាត់ដេរនៅកម្ពុជា ហៅកាត់ថា GMAC បានថ្លែងប្រាប់ ស៊ីស៊ីថាមស៍នៅថ្ងៃនេះថា សេចក្តីណែនាំនេះរៀបចំឡើងដើម្បីចូលរួមទប់ស្កាត់ការឆ្លងរីករាលដាលនៃជំងឺរលាកសួតដោយវីរុស«កូរ៉ូណា» ខណៈបច្ចុប្បន្នរដ្ឋាភិបាលកម្ពុជា រួមមានអាជ្ញាធរពាក់ព័ន្ធកំពុងខិតខំប្រឹងប្រែងពិនិត្យគ្រប់គ្រងជំងឺនេះ។
សមាគមរោងចក្រកាត់ដេរនៅកម្ពុជា បានកោតសរសើរដល់សមាជិក ដែលបានសកម្មក្នុងការចាត់វិធានការការពារកម្មករនិយោជិត និង លើកទឹកចិត្តសមាជិកទាំងអស់បន្តអនុវត្តវិធានការការពាររហូតដល់មានការណែនាំថ្មីពីរដ្ឋាភិបាលកម្ពុជា៕