សហគមន៍២៨វិច្ឆិកា៖កម្ពុជាតេស្តរកកូវីដលើអ្នកពាក់ព័ន្ធជាង១ម៉ឺននាក់ វិជ្ជមាន៣២នាក់

ភ្នំពេញ៖ ក្រសួងសុខាភិបាលបានឱ្យដឹងថា គិតត្រឹមម៉ោង៧ព្រឹកថ្ងៃទី ៧ ខែធ្នូឆ្នាំ២០២០នេះ បានរកឃើញករណីវិជ្ជមានវីរុសកូវីដ-១៩ ថ្មីចំនួន០២នាក់ទៀត ជាអ្នកដែលពាក់ព័ន្ធទៅនឹងព្រឹត្តិការណ៍២៨ វិច្ឆិកា ហើយនៅថ្ងៃនេះក៏មិនមានអ្នកជាសះស្បើយពីជំងឺកូវីដ-១៩នោះទេ។

ដោយឡែកចំពោះលទ្ធផលធ្វើតេស្តអ្នកប៉ះពាល់ក្នុង«ព្រឹត្តិការណ៍សហគមន៍២៨វិច្ឆិកា»គិតពីថ្ងៃទី២៩ ខែវិច្ឆិកា ដល់ថ្ងៃទី០៦ ខែធ្នូឆ្នាំ២០២០ ក្រសួងសុខាភិបាល បានធ្វើតេស្តអ្នកប៉ះពាល់សរុបទាំងអស់បានចំនួន ១១ ៣០៥សំណាក ដែលនៅក្នុងចំនួននេះ មានអ្នកវិជ្ជមានវីរុសកូវីដ-១៩ ថ្មី សរុបចំនួន ៣២នាក់ ដែលកំពុងសម្រាកព្យាបាលនៅមន្ទីរពេទ្យ។

ជារួមមកដល់ថ្ងៃនេះ កម្ពុជាបានរកឃើញអ្នកមានវីរុសកូវីដ-១៩ ចំនួន៣៤៨នាក់ ក្នុងនោះព្យាបាលជាសះស្បើយសរុបទូទាំងប្រទេសចំនួន ៣០៦នាក់ និងកំពុងសម្រាកព្យាបាលនៅមន្ទីរពេទ្យចំនួន ៤២នាក់។