ភ្នំពេញ៖ រដ្ឋាករស្វយ័តដឹកជញ្ជូនសាធារណៈរថយន្តក្រុងរាជធានីភ្នំពេញ បានឲ្យដឹងថា បុគ្គលិកនៃអង្គភាពបម្រើសេវាដឹកជញ្ជូនសាធារណៈម្នាក់ត្រូវបានបញ្ឈប់ពីរដ្ឋាករ ដោយសារបុគ្គលិករូបនេះបានបន្ទោបង់ទឹកនោមដាក់កង់រថយន្តក្រុងនៅទីសាធារណៈ។ នេះបើតាមសេចក្តីប្រកាសរបស់រដ្ឋាករស្វយ័តដឹកជញ្ជូនសាធារណៈរថយន្តក្រុងរាជធានីភ្នំពេញ នៅថ្ងៃទិ២៨ ខែកុម្ភៈនេះ។
រដ្ឋាករស្វយ័តដឹកជញ្ជូនសាធារណៈរថយន្តក្រុង(City Bus) រាជធានីភ្នំពេញ បានប្រាប់ទៅសាធារណៈជនថា បន្ទាប់ពីទទួលបានព័ត៌មាន និងរូបភាពបុគ្គលិក ឈ្មោះ ចេង ចិត្រា ភេទប្រុស បើកបររថយន្តក្រុងស្លាកលេខ ៣-០១៩៧ ធ្វើការបន្ទោបង់ដាក់កង់រថយន្តក្រុងនៅទីសាធារណៈ ស្ថិតនៅចំណុចប្រសព្វផ្លូវ ១៣០ កែងមហាវិថីព្រះនរោត្តម កាលពីថ្ងៃទី២៨ ខែកុម្ភៈនេះ វេលាម៉ោង ១២:០០នាទី។
បើតាមរដ្ឋាករពិនិត្យឃើញថាទង្វើនេះ បានធ្វើឲ្យប៉ះពាល់ដល់កិត្តិយសអង្គភាពសេវាដឹកជញ្ជូនសាធារណៈ ជាពិសេសបានធ្វើឲ្យប៉ះពាល់ដល់សេចក្តីថ្លៃថ្នូរ សុជីវធម៌ អនាម័យ សណ្តាប់ធ្នាប់សាធារណៈ និងសោភ័ណភាពរាជធានីភ្នំពេញផងដែរ។
ពាក់ព័ន្ធនឹងករណីខាងលើនេះរដ្ឋាករស្វយ័តដឹកជញ្ជូនសាធារណៈរថយន្តក្រុង(City Bus) រាជធានីភ្នំពេញ បានចាត់វិធានការបញ្ឈប់បុគ្គលិករូបនេះពីរដ្ឋាករចាប់ពីពេលនេះតទៅ៕