ដើម្បីដោះស្រាយកកស្ទះ«ផ្លូវក្រោមដីរង្វង់មូលចោមចៅ»ត្រូវបានដាក់ឱ្យដំណើរការបណ្តោះអាសន្ន

ភ្នំពេញ៖គិតមកទល់ពេលនេះ ការស្ថាបនាផ្លូវក្រោមដីនៅចំណុចរង្វង់មូលចោមចៅ ក្នុងសង្កាត់ចោមចៅទី៣ ខណ្ឌពោធិ៍សែនជ័យសម្រេចការសាងសង់បាន១០០ភាគរយ ហើយរាជរដ្ឋាភិបាលបានប្រកាសដាក់ឱ្យដំណើរការជាបណ្តោះអាសន្ន ដើម្បីកាត់បន្ថយការកកស្ទះចរាចរណ៍។

នាយករដ្ឋមន្ត្រីនៃកម្ពុជា សម្តេច ហ៊ុន សែន នៅថ្ងៃទី២៦ តុលានេះ បានយល់ព្រមតាមសំណើររបស់ឯកឧត្ដម ឃួង ស្រេង អភិបាល នៃគណៈអភិបាលរាជធានីភ្នំពេញ ដើម្បីធ្វើការសម្រេចចិត្តបើកឱ្យដំណើរការ«ផ្លូវក្រោមដីរង្វង់មូលចោមចៅ»។

ឯកឧត្ដម ឃួង ស្រេង អភិបាល នៃគណៈអភិបាលរាជធានីភ្នំពេញ បានថ្លែងថា បច្ចុប្បន្នការស្ថាបនាផ្លូវក្រោមដីនៅចំណុចរង្វង់មូលចោមចៅ ក្នុងសង្កាត់ចោមចៅទី៣ ខណ្ឌពោធិ៍សែនជ័យ បានអនុវត្តរួចរាល់។ដើម្បីកាត់បន្ថយការកកស្ទះចរាចរណ៍សាលារាជធានីភ្នំពេញបានដាក់ស្នើសុំទៅប្រមុខរដ្ឋាភិបាលកម្ពុជាលោកហ៊ុន សែន ដើម្បីដាក់ឱ្យដំណើរការបណ្តោះអាសន្ន«ផ្លូវក្រោមដីរង្វង់មូលចោមចៅ»។

គួរបញ្ជាក់ផងដែរថា ស្ពានអាកាស និងផ្លូវក្រោមដីនៅចំណុចរង្វង់មូលចោមចៅនេះបានបើកការដ្ឋាន ដំណើរការសាងសង់ជាផ្លូវការកាលថ្ងៃទី២៩ មិថុនា ឆ្នាំ២០១៨ កន្លងមក។ស្ពានអាកាស និងផ្លូវក្រោមដីចោមចៅជាគម្រោងរបស់រាជរដ្ឋាភិបាលកម្ពុជាតាមរយៈ រដ្ឋបាលរាជធានីភ្នំពេញដោយទទួលម៉ៅការសាងសង់ដោយក្រុមហ៊ុនវិនិយោគទុនអានិកជនកម្ពុជា (OCIC) ដោយប្រើប្រាស់ការសាងសង់ក្នុងរយៈពេល៣០ ខែនិងចំណាយថវិការសាងសង់ចំនួន២២ ​លានដុល្លាអាមេរិក។

ផ្លូវលើផ្ទៃដី ជាផ្លូវមេតភ្ជាប់ចរាចរណ៍ពីផ្លូវជាតិលេខ៤ មកផ្លូវវេងស្រេង មានប្រវែងសរុប ២៣៥ ម៉ែត្រ ទទឹង ៨.៥ ម៉ែត្រ សម្រាប់ចរាចរណ៍មួយទិស ដែលមានពីរគន្លងរថយន្ត និងមួយគន្លងទោចក្រយានយន្ត។ ផ្លូវក្រោមដីជាផ្លូវតភ្ជាប់ចរាចរណ៍ពីផ្លូវជាតិលេខ៤ មកមហាវិថីសហព័ន្ធរុស្ស៊ី ដែលមានប្រវែងសរុប ៤៧០ ម៉ែត្រ ទទឹង ៨.៥ ម៉ែត្រ សម្រាប់ចរាចរណ៍មួយទិស ដែលមានពីរគន្លងរថយន្ត និងមួយគន្លងទោចក្រយានយន្ត៕