Cct850x100 1

បណ្ឌិតគិន ភាធ្វើបទបង្ហាញស្តីពី«អត្ថប្រយោជន៍នៃការសិក្សាភាសាចិន»

ព័ត៌មានជាតិ
/
អ្នកយកព័ត៌មាន:
ស៊ីស៊ីថាមស៍
/
ឯកឧត្តមបណ្ឌិតគិន ភា​ ប្រធានវិទ្យាស្ថានទំនាក់ទំនងអន្តរជាតិកម្ពុជានៃរាជបណ្ឌិត្យសភាកម្ពុជា។

ភ្នំពេញ៖ ឯកឧត្តមបណ្ឌិតគិន ភា​ ប្រធានវិទ្យាស្ថានទំនាក់ទំនងអន្តរជាតិកម្ពុជានៃរាជបណ្ឌិត្យសភាកម្ពុជាយល់ឃើញថា ចិនជាប្រទេសមហាអំណាចមានប្រជាជនច្រើន សេដ្ឋកិច្ចទីពីរលើពិភពលោក និងវប្បធម៌ដ៏ចំណាស់។ នេះជាហេតុនាំឲ្យមានសារប្រយោជន៍ជាច្រើនដល់ការសិក្សាភាសាចិន។

នៅរសៀលថ្ងៃទី២២ ខែកញ្ញា ឆ្នាំ២០២០ ឯកឧត្តមបណ្ឌិត គិន ភា បានអញ្ជើញធ្វើបទបង្ហាញស្តីពី «អត្ថប្រយោជន៍នៃការសិក្សាភាសាចិន»ដល់សិក្ខាកាមសរុប២០០នាក់ដែលជាលោកគ្រូ អ្នកគ្រូបង្រៀនភាសាចិននៅតាមគ្រឹះស្ថានអប់រំភាសាចិននានានៅកម្ពុជា។

សិក្ខាសាលាបណ្តុះបណ្តាលគ្រូបង្រៀនភាសាចិនក្នុងតំបន់នេះមានរយៈពេល១០ថ្ងៃ ពីថ្ងៃទី២១ ដល់ថ្ងៃទី៣០ ខែកញ្ញា ឆ្នាំ២០២០។

នៅក្នុងការធ្វើបទបង្ហាញតាមរយៈប្រព័ន្ធវីដេអូ Conference ឯកឧត្តមបណ្ឌិត គិន ភា បានឱ្យតម្លៃខ្ពស់លើការអប់រំ ជាពិសេសការសិក្សាភាសាចិន ដោយឯកឧត្តមបណ្ឌិតបានមានប្រសាសន៍លើកឡើងថា អ្នកសិក្សាភាសាចិននឹងទទួលបានចំណេះដឹងនិងបទពិសោធន៍ថ្មីៗ, អាចស្រាវជ្រាវឯកសារផ្សេងៗតាមរយៈភាសាចិន និងអាចសិក្សាប្រព័ន្ធច្បាប់របស់ប្រទេសចិន ជាពិសេសអាចទទួលបានអាហារូបករណ៍ទៅសិក្សានៅប្រទេសចិន។

បន្ថែមលើសពីនេះ ឯកឧត្តមបណ្ឌិតបានមើលឃើញថា ដោយសារប្រទេសចិនជាប្រទេសដែលមានប្រជាជនច្រើនជាងគេនៅលើពិភពលោក ហើយស្ទើរតែមួយភាគ៤ នៃប្រជាជនលើពិភពលោកចេះនិយាយភាសាចិន ដូច្នេះចេះភាសាចិនអាចមានលទ្ធភាពទទួលបានការងារច្រើន មានទីផ្សារការងារច្រើន និងទទួលបានប្រាក់ចំណូលខ្ពស់។

ឯកឧត្តមបណ្ឌិតបានលើកឡើងបន្ថែមថា ការសិក្សាភាសាចិនគឺជាយានមួយដ៏សំខាន់នៅក្នុងវិស័យសេដ្ឋកិច្ច ដោយសារមហាយក្សចិនជាប្រទេសដែលមានសេដ្ឋកិច្ចលំដាប់ថ្នាក់ទីពីរនៅលើពិភពលោក ដូច្នេះសិក្សាភាសាមួយនេះ អាចបង្កើននូវវិនិយោគមួយផ្នែកធំទៅសេដ្ឋកិច្ចជាតិ ការបង្កើនអាជីវកម្មផ្សេងៗ តាមរយៈការទំនាក់ទំនងដោយប្រើភាសាចិន។ 

ជាមួយនេះ ឯកឧត្តមបណ្ឌិតបានបញ្ជាក់ថា ការសិក្សាភាសាចិនជាសារមួយដ៏សំខាន់ក្នុងទំនាក់ទំនងរវាងប្រជាជននិងប្រជាជន តាមរយៈការយល់ដឹងពីវប្បធម៌ដ៏ចំណាស់របស់ប្រទេសចិន និងអាចផ្សព្វផ្សាយវប្បធម៌ខ្មែរទៅកាន់ជនជាតិបរទេសតាមរយៈភាសាចិន ព្រមទាំងនយោបាយនិងទំនាក់ទំនងការទូតជាមួយប្រទេសចិនដែលកំពុងត្រូវបានរឹតចំណងមិត្តភាព កម្ពុជា-ចិនដែលមានតាំងពីយូរណាស់មកហើយ និងបង្កើតកម្មវិធីផ្សេងៗដែលទាក់ទង មិត្តភាពកម្ពុជា-ចិនឲ្យកាន់តែរឹងមាំថែមទៀត។

Khcct banner

អត្ថបទទាក់ទង